वीरगंज । मनसुनजन्य विपद् तथा अन्य प्राकृतिक एवं मानवजन्य प्रकोपलाई लक्षित गर्दै सशस्त्र प्रहरी बल, नेपाल नं. १३ गण मुख्यालय पर्साले सञ्चालन गरेको तीनदिने ‘विपद् स्वयंसेवक परिचालन विस्तारित पुनर्ताजगी तालिम’ सम्पन्न भएको छ ।
सशस्त्र प्रहरी बल, नेपाल नं. १३ गण मुख्यालय पर्साको आयोजना तथा वीरगंज महानगरपालिकाको संयोजनमा सञ्चालन गरिएको उक्त तालिम असार २ गतेदेखि वीरगंज महानगरपालिका कार्यालयको सभाहलमा सुरु भएको थियो ।
तालिममा स्थानीय समुदायका ३० जना स्वयंसेवकहरूको सहभागिता रहेको थियो । तालिम अवधिभर सशस्त्र प्रहरी बलका दक्ष प्रशिक्षकहरूले विपद् व्यवस्थापन, प्राथमिक उपचार, खोज तथा उद्धार कार्य, विपद्को समयमा अपनाउनुपर्ने सावधानी र स्वयंसेवकको भूमिकाबारे व्यावहारिक तथा सैद्धान्तिक प्रशिक्षण दिएका थिए ।
तालिम समापन कार्यक्रममा वीरगंज महानगरपालिकाका प्रमुख प्रशासकीय अधिकृत बसन्तबहादुर बोहरा प्रमुख अतिथिका रूपमा उपस्थित रहेका थिए । कार्यक्रममा सशस्त्र प्रहरी बल, नेपाल नं. १३ गण पर्साका गणपति सशस्त्र प्रहरी उपरीक्षक मोहनबहादुर क्षेत्रीलगायत अन्य अधिकृतहरूको पनि उपस्थिति रहेको थियो ।
समापन समारोहलाई सम्बोधन गर्दै वक्ताहरूले विपद्को समयमा स्थानीय स्वयंसेवकहरूको भूमिका महत्वपूर्ण हुने उल्लेख गर्दै तालिमबाट प्राप्त ज्ञान र सीपलाई समुदायस्तरमा उपयोग गर्न सहभागीहरूलाई आग्रह गरेका थिए ।
सशस्त्र प्रहरी बलले यस प्रकारको तालिमले वीरगंज तथा आसपासका क्षेत्रमा हुन सक्ने सम्भावित विपद्जन्य क्षति न्यूनीकरण गर्न तथा जनधनको सुरक्षामा महत्वपूर्ण योगदान पुग्ने विश्वास व्यक्त गरेको छ ।
