वीरगंज । पर्साको वीरगंज महानगरपालिका–१९ मा शनिबारदेखि श्री बिन्दवासिनी माई टी–२० नकआउट क्रिकेट प्रतियोगिता सुरु भएको छ । श्री बिन्दवासिनी माई युवा क्लब, वीरगंज–१९ को आयोजनामा सुरु भएको प्रतियोगिताको उद्घाटन राष्ट्रिय स्वतन्त्र पार्टी (रास्वपा) का महाधिवेशन प्रतिनिधि तथा युवा नेता सुधिर पटेलले गरेका हुन् ।
प्रमुख अतिथिका रूपमा सहभागी भएका नेता पटेलले प्रतियोगिताको औपचारिक उद्घाटन गर्दै खेलाडीहरूलाई शुभकामना व्यक्त गरेका थिए । उनले खेलकुदले युवाहरूमा अनुशासन, नेतृत्व क्षमता, आपसी सद्भाव र प्रतिस्पर्धी भावना विकास गर्न महत्वपूर्ण भूमिका खेल्ने बताए ।
उनले यस्ता प्रतियोगिताले स्थानीय स्तरमा लुकेर रहेका खेल प्रतिभाहरूलाई अवसर प्रदान गर्नुका साथै समाजमा सकारात्मक सन्देश प्रवाह गर्ने उल्लेख गरे । खेलकुदको माध्यमबाट युवालाई कुलत तथा विकृतिबाट टाढा राख्न सकिने भन्दै उनले खेलकुद क्षेत्रको विकासका लागि सबै पक्षको सहयोग आवश्यक रहेको धारणा राखे ।
आयोजक क्लबका पदाधिकारीहरूले प्रतियोगितामा विभिन्न टोलीहरूको सहभागिता रहेको जानकारी दिँदै प्रतियोगिता सफलतापूर्वक सम्पन्न गर्न आवश्यक सम्पूर्ण तयारी पूरा गरिएको बताए । प्रतियोगिताको विजेता तथा उपविजेता टोलीलाई नगद, ट्रफी, मेडल तथा प्रमाणपत्र प्रदान गरिने आयोजकले जनाएको छ ।
स्थानीय खेलप्रेमी, समाजसेवी, जनप्रतिनिधि तथा युवाहरूको उल्लेख्य उपस्थितिमा सम्पन्न उद्घाटन समारोह उत्साहपूर्ण वातावरणमा सम्पन्न भएको थियो । आयोजकका अनुसार प्रतियोगिताले स्थानीय क्षेत्रमा क्रिकेट खेलको विकास र युवाबीच एकता तथा भाइचाराको भावना अभिवृद्धि गर्न महत्वपूर्ण योगदान पुर्याउने अपेक्षा गरिएको छ ।
