वीरगंज । वीरगंज महानगरपालिका–१४ स्थित गण्डक क्षेत्रमा सञ्चालन गरिएको लापरवाहीपूर्वक सवारी सञ्चालन (लापसे) सम्बन्धी विशेष चेकजाँच अभियानका क्रममा ५ जना चालकलाई नियन्त्रणमा लिइएको छ ।
जिल्ला ट्राफिक प्रहरी कार्यालय पर्सा, जिल्ला प्रहरी कार्यालय पर्सा तथा नारायणी अस्पताल वीरगंजको संयुक्त सहकार्यमा बिहिवार भएको चेकजाँच कार्यक्रम सञ्चालन गरिएको थियो ।
पथलैया–वीरगंज सडकखण्डमा गुड्ने निजी तथा सार्वजनिक सवारीसाधनका चालकहरूको स्वास्थ्य तथा सवारी सञ्चालन अवस्था परीक्षण गर्ने क्रममा २२ वटा सवारीसाधनका चालकको लापसे चेकजाँच गरिएको थियो ।
जाँचका क्रममा १ वटा निजी तथा ४ वटा सार्वजनिक सवारीसाधनका चालक गरी कुल ५ जनामा लापसे सम्बन्धी समस्या देखिएपछि उनीहरूलाई नियन्त्रणमा लिइएको जिल्ला ट्राफिक प्रहरी कार्यालय पर्साका प्रमुख प्रहरी निरीक्षक दीपेन्द्र श्रेष्ठले जानकारी दिए ।
नियन्त्रणमा लिइएका चालकहरूलाई आवश्यक कानुनी कारबाहीका लागि जिल्ला प्रहरी कार्यालय पर्सामा बुझाइएको प्रहरीले जनाएको छ ।
सवारी दुर्घटना न्यूनीकरण तथा सुरक्षित यातायात व्यवस्थापनलाई प्रभावकारी बनाउन यस्ता चेकजाँच अभियानलाई निरन्तरता दिइने ट्राफिक प्रहरीले जनाएको छ ।
