[real3dflipbook id=”379″]
लापरबाहीले विद्युतीय करेन्टबाट पाँच जनाको मृत्यु
सप्तरी (रासस) । तराई मधेसका जिल्लामा अत्याधिकरूपमा गर्मी बढेको छ । पानी परेको छैन, तापक्रम दिनदिनै बढ्दो छ । यसले मधेसमा गर्मी असह्य बनेको छ । बिहानैदेखि लाग्ने चर्को घामले जनजीवन कष्टकर बनाएको छ । उखरमाउलो गर्मीले सहर(बजारमा दिउँसो चहलपहल पातलिएको छ ।
गर्मी यति बिघ्न छ कि पङ्खाबिना एकै क्षण बस्न पनि गाह्रो छ । सप्तरीको बोदे बर्साईन नगरपालिका ३ मधुवनका रामअशिष यादवका छोरा १८ वर्षीय रामनरेश यादव शुक्रबार घरबाहिर निस्कन सकेनन् । टन्टलापुर घाम र गर्मीका कारण घरबाट बाहिर निस्कन नसकेका उनी हावा खान घरकै बरन्डामा बसे । असह्य गर्मीका कारण पर्खालमा टेबल पङ्खा राखेर हावा लिन थाले । अचानक हातले पङ्खामा छुन पुगेका रामनरेश करेन्ट लागेर घाइते भए ।
घाइतेलाई उपचारका लागि छिन्नमस्ता अस्पताल राजविराज ल्याइयो । चिकित्सकले ढिला भएको भन्दै मृत घोषणा गरे । करेन्ट लागेर सप्तरीमा योसमेत नयाँ आर्थिक वर्षमा मृत्यु हुनेको सङ्ख्या पाँच पुगेको जिल्ला प्रहरी कार्यालय सप्तरीले जनाएको छ ।
साउन १८ गते कञ्चनरूपमा बुहारीलाई करेन्ट लागेको देखेर जोगाउन जाँदा ससुरासमेतको मृत्यु भएको सप्तरीवासीले बिर्सिएका छैनन् । कञ्चनरूप नगरपालिका ६ घोघनपुरका नरेश सरदारकी श्रीमती २० वर्षीया अञ्जली सरदारलाई करेन्ट लागेको देखेर जोगाउन गएका उनका काका ससुरा ४० वर्षीय मधु भनिने सौदानन्द सरदारको समेत मृत्यु भएको थियो ।
घर आँगनमा रहेको ट्युबवेलमा जडान रहेको पानी तान्ने मोटर चलाउँदा अञ्जलीलाई करेन्ट लागेको थियो ।
यसैगरी सप्तरीको राजगढ गाउँपालिका(२ कमलपुर बस्ने दुखी साहका छोरा ५६ वर्षीय शिवशङ्कर साहको समेत साउन १७ गते करेन्ट लागेर मृत्यु भएको थियो । आफ्नै घरको आँगनमा रहेको चापाकलमा जडान गरिएको मोटरमा पानी तान्ने क्रममा करेन्ट लागी उनको मृत्यु भएको हो ।
खडक नगरपालिका(११ लालपुरमा साउन ९ गते खेतमा सिँचाइ गर्नका लागि जडित मोटर खोल्ने क्रममा करेन्ट लागेर ६० वर्षीय शत्रुघ्न खङ्ग मण्डलको ज्यान गयो । लापरबाहीकै कारण सप्तरीमा गत एक वर्षको अवधिमा करेन्ट लागेर १२ जनाले अकालमा ज्यान गुमाएका छन् ।
यो वर्षको सुरुआतमै पाँच जनाको करेन्ट लागेर मृत्यु भइसकेको सप्तरी प्रहरीले जनाएको छ । आर्थिक वर्ष २०७८/०७९ को तथ्याङक हेर्दा करेन्ट लागेर ज्यान गुमाउनेको सङ्ख्या १२ र घाइते हुनेको सङ्ख्या २६ जना रहेको जिल्ला प्रहरी कार्यालय सप्तरीले जानकारी दिएको छ ।
ज्यान गुमाउनेमा चार महिला, छ पुरुष र दुई बालक रहेका छन् । जिल्ला प्रहरी कार्यालय सप्तरीका सूचना अधिकारी प्रहरी नायब उपरीक्षक माधवप्रसाद काफ्लेका अनुसार करेन्टका ४० घटनामा तीन चौपायाको समेत मृत्यु भएको छ ।
घाइते हुनेमा १२ महिला, आठ पुरुष र छ बालक थिए । ज्यान गुमाउनुको मुख्य कारण मानिसहरूको लापरवाही र विद्युत् प्राधिकरणको पनि लापरवाही हुने गरेको जिल्ला प्रहरी कार्यालयको निष्कर्ष छ ।
सावधानीपूर्वक बिजुलीको प्रयोग गर्न, बिग्रेका विद्युत् उपकरणको समयमै मर्मत गरेर उपयोग गर्न र गैरकानूनी तरिकाले बिजुलीको दुरूपयोग नगर्न सप्तरी प्रहरीले अपिल गरेको छ ।
‘श्रीकृष्ण जन्माष्टमी’काे अवसरमा गिता मन्दिरमा प्रसाद वितरण
वीरगंज । वैदिक सनातन धर्मावलम्बीले ‘श्रीकृष्ण जन्माष्टमी’ पर्व शुक्रबार देशभर भगवान् श्रीकृष्णको पूजा–आराधना गरी श्रद्धा–भक्तिपूर्वक मनाएका छन् । प्रत्येक वर्ष भाद्र कृष्ण अष्टमीका दिनमा मनाइने श्रीकृष्ण जन्माष्टमी पर्व भगवान् श्रीकृष्णको पूजा आराधना गरी मनाइन्छ ।
हातमा मुरली, शिरमा मयूरको प्वाँख, शितल बगैंचामुनी, जीवजन्तुहरुको साथमा गोपिनीहरूको मायामा बाँसुरीको मधूर धून यस्तै वातावरणमा विराजमान प्यारा भगवान श्री कृष्ण आजैको दिन मामा कंशको कैदमा रहेका पिता वासुदेव र माता देवकीको गर्भबाट उनको जन्म भएको मान्यता रहिआएको छ ।
कृष्ण जन्माष्टमीलाई सातम आठम, गोकुलष्टमी, अष्टमी रोहिनी, श्रीकृष्ण जयन्ती, श्री जयन्ती वा कहिलेकाही साधारण भाषामा जन्माष्टमी भन्ने गरिन्छ । ज्ञानयोग, कर्मयोग र भक्तियोगका प्रणेता भगवान् श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले आजको दिनलाई ‘श्रीकृष्ण जन्माष्टमी’ र रातलाई ‘मोहरात्री’ भनिन्छ ।
यस दिन देशभरिका कृष्णमन्दिरमा भगवान् श्रीकृष्णको पूजा–आराधना, प्रवचन, भजनकीर्तन गर्नाका साथै विशेष गरी महिला, पुरुष ‘व्रत’ गरी रातभर जाग्राम बस्ने प्रचलन छ । अन्याय, अत्याचार र राक्षसी प्रवृत्तिबाट सम्पूर्ण मानवको रक्षा गर्न भगवान् विष्णुको आठौँ अवतारका रूपमा जन्मनुभएका श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गरेका थिए ।
कुरुक्षेत्रमा कौरवहरूसँगको लडाइँमा संलग्न पाण्डवमध्येका अर्जुनलाई उपदेश दिने क्रममा स्वयम् श्रीकृष्णका मुखारविन्दबाट व्यक्त ‘श्रीमद्भागवतगीता’ पवित्र ग्रन्थ मानिन्छ । छोटकरीमा गीता नामले समेत चिनिने यो ग्रन्थ विश्वमै सबैभन्दा बढी भाषामा अनुवाद भएको विश्वास गरिन्छ ।
बाल्यकालदेखि नै आफ्ना विचित्र लीला देखाएका श्रीकृष्णले पुतना, कंश, जरासन्ध र शिशुपालजस्ता दानवी प्रवृत्तिको संहार गर्नुभएको पौराणिक ग्रन्थमा उल्लेख छ ।
यस अवसरमा शुक्रबार देशभरी जस्तै पर्साकाे विभिन्न ठाउँमा रहेकाे भगवान श्री कृष्णको मन्दिरमा मेला लागेकाे थियाे । वीरगंज महानगरपालिकाको प्रसिद्ध गीता मन्दिर लगायत जिल्लाभरीका श्री कृष्ण मन्दिरमा मेला लागेको थियाे ।

यसै बिच वीरगंजस्थित गिता मन्दिरमा परिवर्तन नेपाल फाउन्डेसनले प्रसाद वितरण गरेको छ । कृष्णा जन्माष्टमीको अवसरमा मन्दिरमा दर्शन गर्ने आउने भक्तजनलाई प्रसाद वितरण गरिएको फाउन्डेसनका सचिव बिशेष साहले वताए ।
फाउन्डेसनका अध्यक्ष रणधीर वर्णवालकाे नेतृत्वमा गरिएकाे प्रसाद वितरण कार्यमा संस्थाका उपाध्यक्ष नेहा साह, सचिव बिशेष साह, कोषाध्यक्ष शुशील पटेल, संचालन प्रमुख अतुल राउत, सदस्यता संयोजक विजय साह, सदस्य नीतू यादव, बालेश्वर जैसवाल लगायतकाले सहयाेग गरेका थिए ।
मकवानपुरमा पहिलो पटक देशभरका रोट्रयाक्ट क्लबकाे भेला हुँदै
वीरगंज । बाग्मती प्रदेशको राजधानी हेटौंडामा देशभरका रोट्रयाक्ट क्लबका अध्यक्ष र सचिवहरु भेला हुने भएका छन् । रोट्रयाक्ट डिष्ट्रिक ३२९२ ले हरेक वर्ष गर्ने अध्यक्ष र सचिवहरुको भेला यो वर्ष हेटौंडामा हुन लागेको हो ।
भदौ २५ गते शनिबार १ सय ७६ वटा रोट्रयाक्ट क्लबका अध्यक्ष र सचिवहरुको भेला हुने क्लबले जनाएको छ । आयोजक रोट्रयाक्ट क्लब अफ हेटौंडा र सह आयोजकमा राेट्रयाक्ट क्लब अफ मकवानपुर, सिमरा बारा, वीरगंज मेट्राेपाेलिस, युनाइटेड वीरगंज, सिन्धुलीगढी, बर्दीबास, बुटवल साउथ, पाेखरा र वीरगंज रहेका छन् ।
सो अवसरमा देशभरीका १ सय ७६ वटा क्लबका अध्यक्ष, सचिव र सदस्यहरुको सहभागिता रहनेछ । रोट्रयाक्ट मकवानपुरका अध्यक्ष प्रदिप कुमार राईले मकवानपुरमा पहिलो पटक देशभरको अध्यक्ष र सचिवहरुको भेला हुन लागेको बताए ।
उनले देशभरका करिब १ हजार जना भन्दा बढीको सहभागिता रहने भेलाले वर्षभरमा गरिएको कार्यको समिक्षा र भावि कार्य योजना बारेमा बृहत क्षलफल र निष्कर्स निकाल्ने जानकारी दिए । भेलामा देशभरको १ सय ७६ रोट्रयाक्ट क्लबका अध्यक्ष र सचिवहरु र भारत लागएत विभिन्न बाहिरी देशहरुका प्रतिनिधिको पनि सहभागिता रहने छ ।
दिनभर चल्ने भेलामा चार घण्टासम्म तालिम सत्र संचालन हुने छ भने क्लबका अध्यक्ष र सचिवको लागि छुटै प्रशिक्षण दिइने छ । कार्यक्रमको खर्च २० लाखको हाराहारीमा हुने अनुमान गरिएको छ । हरेक वर्ष हुने बैठक गत वर्ष पोखरामा भएको थियो ।
राईकै अध्यक्षतामा भएको पत्रकार सम्मेलनमा रोटरी क्लब अफ हेटौंडाका अध्यक्ष सुयश पराजुली, रोटरी मकवानपुरका अध्यक्ष कृष्णबहादुर कार्की, रोटर्याक्ट मकवानपुरका पुर्व अध्यक्ष प्रतिक्षा न्यौपाने, रोयर्याक्ट हेटौंडाका संस्थापक अध्यक्ष अनुराग अधिकारी, पुर्व अध्यक्ष सरोज देवकोटा लगायतको उपस्थिती रहेको थियो ।
वडाध्यक्ष यादवकाे समाजिक संजालबाट राजिनामा र पुन: फिर्ता
बीरगंज । समाजिक संजाल फेसबुकबाट राजिनामा दिएकाे घाेषणा गरेकाे वीरगंज महानगरपालिका वडा नम्बर १५ का वडाध्यक्ष रमेश प्रसाद यादवले त्यसकाे केही समय मै पुन: सामाजिक संजाल फेसबुकबाट नै राजिनामा फिर्ता लिएका छन् ।
वडाध्यक्ष यादवले आफ्नाे फेसबुकमा हस्तलिखित राजिना पाेष्ट गरेका थिए । साे राजिनामा पत्रमा आफूले पार्टी र पद दुबैबाट राजिनामा दिएकाे जनाएका थिए । त्यसकाे केही समयपछि पुन: उनले हस्तलिखित एक पत्र पाेष्ट गर्दै आफूले राजीनामा नदिएकाे जनकारी गराए ।
उनले भुल बस समाजिक संजालमा आफुले राजिनामा दिएकाे प्रचार भइरहेकाेले जनाए ।

जनता समाजवादी पार्टी (जसपा) बाट निर्वाचित वडाअध्यक्ष यादवले पार्टीका पर्सा जिल्ला अध्यक्ष रामनरेश प्रसाद यादवलाई सम्बोधन गर्दै राजीनामा दिएका थिए ।
राजीनामा पत्रमा उनले स्वास्थ्य अवस्था ठीक नभएको भन्दै पार्टीबाट र पदबाट राजीनामा दिएको उल्लेख गरेका थिए । उनले पार्टी र महानगरपालिकाले आफुलाई असहयोग गरेको वताउँदै आक्राेशमा आएर राजिनामा दिएकाे बुझिएकाे छ ।
नेशनल ट्रेडिङको भवनमा मधेस विश्वविद्यालयकाे कार्यालय
वीरगंज । मधेश विश्वविद्यालयको उपकुलपति पदमा वीरगंज पब्लिक कलेजका प्रबन्ध निर्देशक प्राध्यापक डा. दिपक शाक्य नियुक्त भएका छन् । मधेश विश्वविद्यालय ऐन २०७९ को दफा १९ को उपदफा २ बमोजिम मधेश प्रदेशका मुख्यमन्त्री लालबाबु राउतले शाक्यलाई उपकुलपतिमा नियुक्त गरेका हुन् ।
मुख्यमन्त्री राउतले प्राध्यापक डा. शाक्यलाई नियुक्ती पत्र हस्तान्तरण गर्दै आफ्नो पदअनुसारको कर्तब्य पालना गर्न पनि आग्रह गरेका छन् । लामो समयसम्म शैक्षिक क्षेत्रमा सक्रिय रहेका शाक्यले मधेश विश्वविद्यालयको गतिविधि पनि चलायमान बनाएर गरिमा बढाउने मुख्यमन्त्री राउतको बिश्वास छ ।
मधेस विश्वविद्यालयको कार्यालय वीरगंजकाे श्रीपुरमा रहेको नेशनल ट्रेडिङको भवनमा संचालन गरिने छ ।
मधेस प्रदेश सरकारले वीरगंजमा मधेस विश्वविद्यालय सञ्चालन गर्ने निर्णय गरेसँगै संघीय सरकारसँगको सहमतिमा नेशनल ट्रेडिङको खाली भवन कार्यालय संचालन हुने भएकाे हाे ।
नेशनल ट्रेडिङको खाली भवनमा अहिले मर्मतको काम चलिरहेको छ । वर्षौँदेखि खाली रहेको भवन जीर्ण भएकाले त्यसलाई मर्मत र रंगरोगन गरेर मधेस विश्वविद्यालयको कार्यालय खडा गर्न धमाधम काम भइरहेको उपकुलपति डा.शाक्यले जानकारी दिए ।
प्रदेशको नामाकरण अघि प्रदेश सरकारले वीरगंज प्राविधिक विश्वविद्यालय स्थापना गर्ने अध्यादेश प्रमाणिकरणका लागि प्रदेश प्रमुखकोमा पठाएको थियो । तर प्रदेशको नामाकरण पछि त्यसलाई फिर्ता लिँदै उद्धेश्य र नाम परिवर्तन गरेर प्रदेशकै नाम रहने गरी मधेस विश्वविद्यालय बनाएको थियो ।
नेशनल ट्रेडिङको भवन पाँच वर्षको लागि भाडामा लिएको र त्यो अवधिमा विश्वविद्यालयको आफ्नै भौतिक संरचना खडा गर्ने गरी काम हुने शाक्य बताउँछन् ।
‘कार्यालय प्राप्त गर्नु नै अहिले ठूलो कुरा भयो, पहिलो चरणमा अहिले कार्यालय स्थापना गरेर काम अघि बढाउने हो, त्यसपछि विश्वविद्यालयको उद्धेश्य अनुसार आवश्यक जग्गा तथा भौतिक संरचना जोड्ने काम हुँदै जान्छ’ उनले भने ।
चालु आबमा १० करोड बजेट विनियोजन
विश्वविद्यालयका लागि चालु आर्थिक वर्षमा प्रदेश सरकारले १० करोड बजेट छुट्याएको छ । यो वर्ष स्थापना वर्ष भएकाले १० करोड बजेट छुट्याइएको भए पनि आउँदा वर्षमा विश्वविद्यालयका लागि आवश्यक पर्ने बजेट छुट्याउँदै जाने नीति प्रदेश सरकारले लिएको छ । जग्गा प्राप्ति, भौतिक संरचना निर्माण लगायतमा बढी बजेट चाहिने भएकाले आउँदा वर्ष बढी बजेटको खाँचो पर्ने छ ।
कर्मचारीमा कसैलाई काखा, कसैलाई पाखा गर्दिन : मेयर सिंह
वीरगंज । वीरगंज महानगरपालिकाका प्रमुख राजेशमान सिंहले सबैको साथले मात्रै वीरगंजलाई व्यवस्थित बनाउन सकिने बताएका छन । हाम्रो वीरगंज कसरी राम्रो हुन्छ त्यसमा तपाईहरु सबैको साथ र सहयोग चाहियो, कसले के गर्यो, के गरेन भनेर भन्नु भन्दा सँगसँगै हिड्न उनले अनुरोध गरे ।
वीरगंज महानगरपालिका तथा यस अन्तर्गत रहेका कार्यालयका कर्मचारी तथा जनप्रतिनिधिहरुलाई तनाव व्यवस्थापन सम्बन्धी एक दिने कार्यशाला गोष्ठीलाई सम्बोधन गर्दै उनले यस्तो बताएका हुन । कार्यक्रममा महानगर प्रमुख सिंहले कर्मचारीहरु आफ्नो परिवार रहेको वताउँदै कसैलाई काखा कसैलाई पाखा गर्ने काम नहुने बताए ।
‘मेयर साहेवले आफ्नो मान्छेलाई काखी च्यापेको, अन्यलाई पाखा लगाएको भन्ने खालको कुरा मैले सुनिरहेको छु,’ उनले भने, ‘मेरो कार्यकालमा कसैलाई काखा, कसैलाई पाखा हुँदैन, त्यस्तो कुरामा तपाईहरु नलाग्नु म आग्रह गर्दछु ।’
कुनै कर्मचारीले आफ्नो शाखामा उत्कृष्ठ काम गर्छ भने उसलाई अन्य ठाउँमा पनि उत्कृष्ठ काम गर्नका लागि पठाइएको हो । त्यसलाई अन्यथा नलिन उनले आग्रह समेत गरे ।
मेयर सिंहले एक ठाउँलाई मात्र राम्रो गरिराख्ने भन्दा पनि सबै शाखा सबै माताहतका कार्यालय उत्कृष्ट बने महानगरको सेवा प्रवाह झनै व्यवस्थित हुने भएकाले सरुवा नियमित हो भनेर बुझ्न कर्मचारीहरुलाई आग्रह गरे ।
उनले भने ‘कर्मचारी सबै मेरो परिवारका सदस्य हुनुहुन्छ, तपाईहरुलाई कुनै समस्या परे सोझै मसँग आउनुस, हुलाकबाट रजिष्ट्रि गरेर चिठि पठाउनु पर्दैन’ ।
वीरगंज महानगरपालिकाका सद्भावना दूत अशोक कुमार बैद्यको अध्यक्षतामा भएको कार्यक्रममा समर्पण सेवा संस्था नेपालका संस्थापक सदस्य समेत रहेका मोटिभेसनल स्पीकर रमेश शर्मा, नविल बैंकका पूर्व कार्यकारी अधिकृत अनिल केशरी शाहले सहभागिहरुलाई तनाव व्यवस्थापन र सेवा प्रवाहमा नागरिक संवेदनशील प्रशासनको प्रवर्दनका विषयमा प्रशिक्षण दिएका थिए ।
कार्यक्रममा वीरगंज महानगरपालिकाका प्रमुख प्रशासकीय अधिकृत लक्ष्मी प्रसाद पौडेल, उद्योगी संजय खेतान, वीरगंज महानगरपालिका तथा नगरपालिकाका कर्मचारी तथा जनप्रतिनिधिहरुको सहभागिता रहेको थियाे ।
निर्वाचन खर्चकाे विवरण नबुझाउनेसंग स्पष्टिकरण माग
वीरगंज । जिल्ला निर्वाचन कार्यालय पर्साले स्थानीय तह सदस्य निर्वाचनमा भएकाे खर्चकाे विवरण नबुझाउने उम्मेदवारसंग स्पष्टिकर साेधेकाे छ । निर्वाचन कार्यालयले भदाै १ गते पर्साका सबै स्थानिय तहलाई एक पत्र लेख्दै निर्वाचन खर्च नबुझाउने उम्मेदवारहरुलाई ७ दिन भित्र स्पष्टिकरण पेश गर्न अनुराेध गरेकाे छ ।
निर्वाचन परिणाम घाेषणा भएकाे मितिले ३० दिन भित्र जिल्ला निर्वाचन कार्यालयमा खर्च विवरण बुझाउनु पर्ने कानूनी व्यवस्था रहेकाे छ । साेही व्यवस्था बमाेजिम निर्वाचन कार्यालयलले स्थानिय तहकाे निर्वाचनमा भाग लिई ताेकिएकाे समयवधि भित्र निर्वाचन खर्चकाे विवरण नबुझाउने उम्मेदवारहरुलाई ताेकिएकाे समावधि भित्र के कुन कारणले निर्वाचन खर्चकाे विवरण नबुझाएकाे ? निर्वाचन खर्चकाे विवरण नबुझाएकाेमा तपाईहरुलाई निर्वाचन आयाेग एेन, २०७३ काे दफा २६ बमाेजिम किन कारवाही हुनु नपर्ने हाे ? साेही दफाकाे उपदफा (४) बमाेजिम उम्मेदवारहरुले आफ्नाे सफाई सहितकाे स्पष्टिकरण पेश गर्न आग्रह गरेकाे छ ।
पर्साका दुई पालिका प्रमुखमा निर्वाचित उम्मेदवारले मात्र निर्वाचन खर्चकाे विवरण बुझाएका छन् । यसका साथै केही वडाध्यक्ष र वडा सदस्यमा निर्वाचितले पनि खर्चकाे विवरण बुझाए पनि अधिकांश उम्मेदवार खर्चकाे विवरण बुझाउन वाकी रहेकाे छ ।
पर्साका १४ स्थानिय तहका ३ हजार २ सय ९८ उम्मेदवार मध्ये ४१ जनाले मात्र समयमा निर्वाचन खर्चकाे विवरण बुझाएका छन् । निर्वाचन कार्यालय पर्साले उपलब्ध गराएकाे विवरण अनुसार ३ हजार २ सय ५७ उम्मेदवारले खर्च विवरण बुझाउन बाकी रहेकाे छ ।
वीरगंज महानगपालिकाका मेयरमा निर्वाचित जसपाका राजेशमान सिंहले पनि निर्वाचन खर्च विवरण बुझाएका छैनन् । वीरगंज महानगरपालिकामा नेपाल मजदुर किशान पार्टीका मेयरका उम्मेदवार गाेकर्ण प्रसाद काेइरी, स्वतन्त्र उम्मेदवार प्रभात सिंह र राप्रपाका वडा नं. ७ का वडाध्यक्षका उम्मेदवार मनाेज मिश्र र दुई जना वडा सदस्यका उम्मेदवारले मात्र निर्वाचन खर्चकाे विवरण समयमा बुझाएका छन् ।
वीरगंज महानगरपालिकामा प्रमुख, उप प्रमुख, वडाध्यक्ष र वडा सदस्यका ८ सय ८१ उम्मेदवार रहेपनि न्युन संख्यामा मात्र निर्वाचन खर्चकाे विवरण बुझाएकाे जिल्ला निर्वाचन कार्यालय पर्साले जनाएकाे छ ।
पर्सामा सबै भन्दा बढी संख्यामा पटेर्वा सुगाैली गाउँपालिकाका उम्मेदवारहरुले निर्वाचन खर्चकाे विवरण बुझाएका छन् । पटेर्वा सुगाैलीका १६१ जना उम्मेदवार मध्ये दुई गाउँपालिका अध्यक्षका उम्मेदवारसहित २५ जनाले खर्चकाे विवरण बुझाएका छन् ।
पटेर्वा सुगाैलीमा निर्वाचन खर्चकाे विवरण बुझाउनेमा नेपाली कांग्रेसबाट गाउँपालिका अध्यक्षमा निर्वाचित दिनेश चाैधरी, एमालेका गाउँपालिका अध्यक्षका उम्मेदवार हरिनारायण चाैधरी, जसपाका दिपक यादव र लाेसपाका महमद मुस्तुफा मन्सुरी रहेका छन् ।
यसैगरी पटेर्वा सुगाैली गाउँपालिका उपाध्यक्षका उम्मेदवार एमालेकी मन्तुरा देवी, वडा नं. १ काे वडाध्यक्षमा एमालेबाट निर्वाचित फरमान मियाँ अन्सारी, वडा नं. १ कै वडाध्यक्षका उम्मेदवार लाेसपाका माेफिल मियाँ मंसुरी, वडा नं. २ काे वडाध्यक्षमा कांग्रेसबाट निर्वाचित विजय गैरे, वडा नं. २ कै वडाध्यक्षका स्वतन्त्र उम्मेदवार महमद नाैसाद आलम, वडा नं. ३ काे वडाध्यक्षमा कांग्रेसबाट निर्वाचित बासु पंजियार लगायत केही वडा सदस्यका उम्मेदवारहरुले पनि निर्वाचन खर्चकाे विवरण समय मै बुझाएका छन् ।
यसैगरी जगरनाथपुर गाउँपालिका अध्यक्षमा अध्यक्षमा कांग्रेसबाट निर्वाचित श्रीकान्त प्रसाद यादव र साेही गाउँपालिका अध्यक्षका जनमत पार्टीका उम्मेदवार चन्दन चाैहानले मात्र निर्वाचन खर्चकाे विवरण समयमा बुझाएका छन् । जगरनाथपुरमा याे दुई जना वाहेका कुनैं पनि उम्मेदवारले निर्वाचन खर्चकाे विवरण बुझाएका छैनन् ।
यसैगरी बिन्दवासिनी गाउँपालिकामा एमालेका गाउँपालिका अध्यक्षका उम्मेदवार गम्भिरा साह तेली र एमालेबाटै उपाध्यक्षमा निर्वाचित ज्याेति देवी चाैरसियाले मात्र निर्वाचन खर्चकाे विवरण समयमा बुझाएका छन् । यस वाहेक कुनै पनि उम्मेदवारले निर्वाचन खर्चकाे विवरण समयमा बुझाएका छैनन् ।
यसैगरी कालिकामाई गाउँपालिकामा कांग्रेसबाट गाउँपालिका उपाध्यक्षमा निर्वाचित राजमती बरैनी, एमालेबाट वडा नं. २ काे वडाध्यक्षमा निर्वाचित साेनालाल प्रसाद चाैरसिया, वडा नं. २ कै कांग्रेसका वडाध्यक्षका उम्मेदवार रामराज चाैरसिया र कांग्रेसबाट वडा नं. ४ काे वडाध्यक्षमा निर्वाचित संजय कुमार साहले निर्वाचन खर्चकाे विवरण समय मै बुझाएका छन् । यस वाहेक कुनै पनि उम्मेदवारले समयमा निर्वाचन खर्चकाे विवरण नबुझाएकाे निर्वाचन कार्यालयले उपलब्ध गराएकाे विवरणमा देखिन्छ ।
छिपहरमाई, धाेबिनी, पकहा मैनपुर, सखुवा प्रसाैनी, जिराभवानी र ठाेरी गाउँपालिकाकाे कुनै पनि उम्मेदवारले निर्वाचन खर्चकाे विवरण बुझाएका छैनन् । यसैगरी पर्सागढी, पाेखरिया र बहुदरमाई नगरपालिकाकाे पनि कुनै उम्मेदवार निर्वाचन खर्चकाे विवरण नबुझाएकाे निर्वाचन कार्यालयकाे विवरणमा देखिन्छ ।
यी सबै उम्मेदवारहरुसंग निर्वाचन आयाेगकाे निर्देशन अनुसार जिल्ला निर्वाचन कार्यालय पर्साले स्पष्टिकरण साेधेकाे हाे ।












