वीरगंज । प्रादेशिक अस्पताल पोखरियामा रहेको एक्सरे मेशीनको केही पार्टपुर्जा ठेकेदारले झिकेर लगेपछि सेवा अवरुद्ध भएको छ। अस्पतालका अनुसार गढीमाई इन्टरप्राइजेजले करिब डेढ वर्षअघि मेशीन जडान गरेको थियो।

अस्पतालले ठेकेदार कम्पनीलाई साढे चार लाख रुपैयाँ भुक्तानी गर्न बाँकी रहेको र पछिल्लो समयमा दिइएको एक महिनाको समयावधिमा रकम भुक्तानी नभएपछि कम्पनीका प्रोप्राइटर विजय गुप्ताले सोमबार मेशीन सञ्चालन नहुने गरी केही पार्टपुर्जा झिकेर लगेका हुन्। यससँगै अस्पतालको एक्सरे सेवा पूर्ण रूपमा बन्द भएको छ।

अस्पताल प्रशासनका अनुसार यहाँ दैनिक २० देखि ३० वटा एक्सरे हुने गर्दथे। सेवा अवरुद्ध हुँदा बिरामीहरू अन्य अस्पतालमा धाउन बाध्य भएका छन्।

अस्पताल विकास समितिका अध्यक्ष उमेश चौहानले प्रदेश सरकारले भुक्तानी नगरेका कारण समस्या उत्पन्न भएको बताए। उनले पोखरिया नपामा भुक्तानीका लागि अनुरोध गरिएको तर सम्बन्धित कार्यालयको खाता अहिलेसम्म सञ्चालनमा नआएकाले रकम निकासा गर्न नसकिएको स्पष्ट पारे।

“एक साताभित्र भुक्तानीको व्यवस्था गर्ने आग्रह गर्दा पनि ठेकेदार पक्ष नमानेर मेशीनका केही सामान लगेकाले सेवा अवरुद्ध भएको हो,” चौहानले भने। सेवा सुचारु गर्न अस्पताल प्रशासनले प्रदेश सरकार र ठेकेदार कम्पनीसँग समन्वय तीव्र बनाएको जनाएको छ।