वीरगंज । आम जनता पार्टी (आजपा)का अध्यक्ष तथा पूर्वमन्त्री प्रभु साहले नेकपा (एमाले)ले लोकतान्त्रिक मूल्य–मान्यताको उल्लंघन गर्दै लोकतन्त्रलाई नै मजाक बनाएको आरोप लगाएका छन्। देवाही–गोनाही नगरपालिकाका मेयर प्रेमलाल साह कानूलाई पदमुक्त गरिएको घटनाप्रति प्रतिक्रिया दिँदै उनले एमालेको कदम संविधान, कानून र लोकतान्त्रिक अभ्यासविपरीत रहेको बताएका हुन्।
शनिबार जारी गरेको वक्तव्यमा अध्यक्ष साहले अन्य दलबाट निर्वाचित जनप्रतिनिधिलाई आफ्नो पार्टीमा भित्र्याउने एमालेले देवाही–गोनाहीका मेयरलाई भने असंवैधानिक रूपमा पदमुक्त गर्नु दोहोरो मापदण्ड भएको टिप्पणी गरे। उनले नेकपा (एमाले)का अध्यक्ष तथा प्रधानमन्त्री केपी शर्मा ओलीले जसपाबाट निर्वाचित वीरगञ्ज महानगरपालिकाका मेयर राजेशमान सिंहलगायत विभिन्न स्थानीय तहका प्रमुखलाई एमालेमा प्रवेश गराएको स्मरण गराउँदै, दल नै नत्यागेका मेयर प्रेमलाल साह कानूलाई पदमुक्त गर्नु हास्यास्पद भएको बताए।
साहले स्थानीय निर्वाचनमा अत्यधिक मतका साथ विजयी भएका मेयर कानूलाई संविधान र कानूनमा व्यवस्था नै नभएको आधारमा हटाइएको दाबी गरे। उनले यस्तो निर्णय नगरपालिकामाथि राजनीतिक नियन्त्रण कायम गर्ने उद्देश्यले गरिएको आरोपसमेत लगाए।
उनले एमाले नेतृत्वलाई नैतिकताको ख्याल गर्न आग्रह गर्दै भने, “अन्य पार्टीबाट निर्वाचित जनप्रतिनिधिलाई दिनदिनै एमालेमा प्रवेश गराउने नेतृत्वले कुन नैतिकताले देवाही–गोनाहीका नगरप्रमुखलाई पदमुक्त गर्यो? वीरगञ्ज महानगरपालिकालगायत देशका दर्जनौँ मेयरलाई केपी ओलीले आफ्नै हातले टीका लगाएर पार्टी प्रवेश गराएको कुरा सबैलाई थाहा छ।”
पूर्वमन्त्री साहले मेयर प्रेमलाल साह कानू एमालेको भोटले नभई आफ्नै जनाधारका आधारमा निर्वाचित भएको दाबी गर्दै पछिल्लो निर्वाचनमा सो नगरपालिकामा एमालेले जम्मा पाँच सय मत मात्र प्राप्त गरेको तथ्यांक पनि उल्लेख गरेका छन्। उनले एमाले नेतृत्वलाई लोकतन्त्रविरोधी र षड्यन्त्रकारी प्रवृत्ति अपनाएको आरोप लगाए।
साहले नेपालको संविधानको धारा २१६ को उपधारा (८) अनुसार स्थानीय तहका प्रमुख, उपप्रमुख, वडाध्यक्ष तथा सदस्यको पद राजीनामा, मृत्यु वा पदावधि समाप्त भएको अवस्थामा मात्र रिक्त हुने स्पष्ट व्यवस्था रहेको उल्लेख गर्दै, त्यसविपरीत गरिएको पदमुक्ति संविधानको भावना विपरीत भएको जिकिर गरेका छन्।
