सिरहा । सिरहाको औरही गाउँपालिका–२, मोतिपुरमा गत श्रावण १४ गते भएको घटनामा मृत्यु भएका गणेश यादवका परिवार र गृह मन्त्रालयबीच सात बुँदे सम्झौता भएको छ ।
गृहमन्त्री सुधन गुरुङ र मृतकका बुवा रामवृक्ष यादवबीच भएको सम्झौतामा सरकारले पीडित परिवारका माग यथाशीघ्र सम्बोधन गर्ने प्रतिबद्धता जनाएको हो ।
सम्झौताअनुसार नेपाल सरकारले गणेश यादवलाई शहीद घोषणा गर्ने प्रक्रिया तत्काल अघि बढाउने तथा मृतकका परिवारलाई १० लाख रुपैयाँ राहत उपलब्ध गराउनेछ । साथै, श्रावण १४ गते गोलबजार क्षेत्रमा भएको घटनाको निष्पक्ष र प्रभावकारी छानबिन गरी दोषीमाथि प्रचलित कानुनबमोजिम कारबाही प्रक्रिया अगाडि बढाइने उल्लेख गरिएको छ ।
यस्तै, मृतकका परिवारका एक जना योग्य सदस्यलाई रोजगारीको अवसर उपलब्ध गराइने, घटनाबारे गठित छानबिन समितिको प्रतिवेदनका सुझाव तथा सिफारिस कानुनअनुसार कार्यान्वयन गरिने सहमति भएको छ ।
सम्झौतामा गणेश यादवको स्मृतिमा स्थानीय सरकारसँग समन्वय गरी उपयुक्त स्थानमा स्मृति पार्क निर्माण गर्ने तथा आवश्यक अन्य पहल गर्ने उल्लेख छ । साथै, मृतकको अन्त्येष्टि शनिबार बिहान १० बजे गर्ने सहमति भएको छ ।
त्यसैगरी, मृतकका भाइ र बहिनीलाई निःशुल्क शिक्षाको व्यवस्था तथा उनका आमा–बुवाको सरकारी अस्पतालमा निःशुल्क उपचारको व्यवस्था नेपाल सरकारले मिलाउने प्रतिबद्धता पनि सम्झौतामा समेटिएको छ ।
उक्त सम्झौतामा मृतकका बुवा रामवृक्ष यादव र गृहमन्त्री सुधन गुरुङले हस्ताक्षर गरेका छन् ।
