वीरगंज । जबरजस्ती करणी मुद्दामा १८ वर्ष कैद सजाय तोकिएका फरार प्रतिवादीलाई पर्सा प्रहरीले पक्राउ गरेको छ ।
जिल्ला प्रहरी कार्यालय पर्साका अनुसार पर्सा जिल्ला अदालतको मिति २०७८ फागुन २९ गतेको फैसलाले जबरजस्ती करणी मुद्दामा १८ वर्ष कैद सजाय तोकिएका पर्साको पोखरिया नगरपालिका–२, लमरियाका २३ वर्षीय सदाम अन्सारीलाई पक्राउ गरिएको हो ।
विशेष सूचनाको आधारमा इलाका प्रहरी कार्यालय पोखरियाबाट खटिएको फैसला कार्यान्वयन टोलीले उनलाई शुक्रबार अपराह्न करिब ४ः३० बजे लमरिया सडकखण्डबाट नियन्त्रणमा लिएको प्रहरीले जनाएको छ ।
पक्राउ परेका अन्सारीलाई आवश्यक कानुनी प्रक्रिया पूरा गरी फैसला कार्यान्वयनका लागि पर्सा जिल्ला अदालतमा बुझाउने कार्य भइरहेको जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक चक्रबहादुर मल्लले जानकारी दिएका छन् ।
