वीरगंज । जिल्ला प्रशासन कार्यालय पर्साले वीरगंज महानगरपालिकाको मुख्य क्षेत्रमा पुनः निषेधाज्ञा जारी गरेको छ । घण्टाघर क्षेत्रमा हिन्दु युवाहरूले टायर बालेर प्रदर्शन गरेपछि सम्भावित सुरक्षा जोखिमलाई मध्यनजर गर्दै प्रशासनले निषेधाज्ञा लागू गरेको हो ।
शुक्रबार दिउँसो जिल्ला प्रशासन कार्यालयमा बसेको सर्वदलीय तथा सर्वपक्षीय बैठकले सुनसरी, सिरहा लगायत देशका विभिन्न जिल्लामा हालै भएका संवेदनशील घटनाको समीक्षा गर्दै पर्सामा शान्ति, सुरक्षा, सामाजिक सद्भाव र अमनचयन कायम राख्ने निष्कर्ष निकालेको थियो । बैठकपछि सद्भाव र्याली समेत आयोजना गरिएको थियो ।
तर सद्भाव र्याली सम्पन्न भएको केही समयमै वीरगंजकाे घण्टाघर क्षेत्रमा पुनः प्रदर्शन भएपछि प्रशासनले स्थिति थप तनावग्रस्त हुन सक्ने आकलन गर्दै निषेधाज्ञा जारी गरेको हाे । सुरक्षा निकायलाई सुनसरी र सिरहाका घटनाको विरोधमा शुक्रबार साँझ थप प्रदर्शन हुन सक्ने सूचना प्राप्त भएपछि सार्वजनिक शान्ति, सुरक्षा र सुव्यवस्था कायम राख्न निषेधाज्ञा जारी गरेकाे हाे ।
जिल्ला सुरक्षा समितिको निर्णयअनुसार प्रमुख जिल्ला अधिकारी भोला दाहालले स्थानीय प्रशासन ऐन, २०२८ को दफा ६(३क) बमोजिम साउन १५ गते शुक्रबार साँझ ५ः०० बजेदेखि साउन १६ गते शनिबार बिहान ६ः०० बजेसम्म लागू हुने गरी निषेधाज्ञा आदेश जारी गरेका छन् ।
प्रशासनका अनुसार निषेधाज्ञा वीरगंज महानगरपालिकाको पूर्वमा प्रतिमा चोक–बसपार्क बाइपास रोड, पश्चिममा तिलावे पुल, उत्तरमा गण्डक चोक र दक्षिणमा शंकराचार्य गेटसम्मको चार किल्लाभित्र लागू हुनेछ ।
उक्त अवधिभर तोकिएको क्षेत्रमा पाँच जनाभन्दा बढी व्यक्ति भेला हुन, सभा, जुलुस, प्रदर्शन तथा अन्य कुनै पनि प्रकारका सामूहिक गतिविधि गर्न रोक लगाइएको छ ।
जिल्ला प्रशासन कार्यालय पर्साले निषेधाज्ञा उल्लंघन गर्ने व्यक्तिलाई नियन्त्रणमा लिएर प्रचलित कानूनबमोजिम कारबाही गरिने चेतावनी दिएको छ । साथै सम्भावित अप्रिय घटना रोक्न तथा सार्वजनिक शान्ति, सुरक्षा र सामाजिक सद्भाव कायम राख्न सबै पक्षलाई संयम अपनाउन प्रशासनले आग्रह गरेको छ ।
