वीरगंज । सशस्त्र प्रहरी बल पर्साले भारतबाट अवैध रूपमा नेपाल भित्र्याउँदै गरेको ४ हजार ५ सय वटा ब्रोइलर कुखुराका चल्ला नियन्त्रणमा लिएर नष्ट गरेको छ।
सशस्त्र प्रहरी बल नेपाल नम्बर १३ गण पर्साअन्तर्गत बीओपी अमरपट्टीबाट खटिएको टोलीले पर्साको विन्दवासिनी गाउँपालिका–३, झौवागुठीबाट उक्त चल्ला नियन्त्रणमा लिएको हो ।
सशस्त्र प्रहरीका अनुसार भारतबाट अवैध रूपमा नेपालतर्फ ल्याउँदै गरेका व्यक्तिहरूले सुरक्षाकर्मीको टोलीलाई देखेपछि चल्ला छाडेर फरार भएका थिए । टोलीले ४५ कार्टुनमा रहेका ४ हजार ५ सय वटा प्रतिबन्धित ब्रोइलर चल्ला बरामद गरेको थियो ।
बरामद चल्लाको अनुमानित मूल्य ३ लाख ३७ हजार ५ सय रुपैयाँ रहेको सशस्त्र प्रहरीले जनाएको छ ।
नियन्त्रणमा लिइएका चल्लालाई पशु क्वारेन्टाइनका प्रतिनिधि, नेपाल प्रहरी तथा स्थानीय बासिन्दाको रोहबरमा शनिबार दिउँसो नियमानुसार नष्ट गरिएको सशस्त्र प्रहरीका सूचना अधिकारी सशस्त्र प्रहरी नायब उपरीक्षक मोहनराज निरौलाले जानकारी दिए ।
