वीरगन्ज । पर्साको जिराभवानी गाउँपालिकामा समावेशी तथा गुणस्तरीय शिक्षा सुनिश्चित गर्ने विषयमा स्थानीय सरकार र सरोकारवालाबीच समन्वय बैठक सम्पन्न भएको छ।
युरोपियन युनियनको आर्थिक सहयोग तथा पिपुल इन निड (PIN), Accountability Lab Nepal, National Campaign for Education Nepal (NCE Nepal), नेपाल अपाङ्ग महिला संघ र दिव्य विकास स्रोत केन्द्र, पर्साको संयुक्त साझेदारीमा सञ्चालित पहुँच परियोजनाअन्तर्गत शुक्रबार बैठक आयोजना गरिएको हो ।
बैठकमा गाउँपालिकाभित्र सबै बालबालिकाको समान पहुँच सुनिश्चित हुने गरी समावेशी तथा गुणस्तरीय शिक्षा प्रणालीको विकास, विद्यालयमा देखिएका समस्या तथा चुनौती र शिक्षा सुधारका लागि स्थानीय तहबाट गर्न सकिने सहयोगका विषयमा छलफल तथा अन्तरक्रिया गरिएको थियो ।
कार्यक्रममा समावेशी शिक्षाको अवधारणा, विद्यालयमा सबै बालबालिकाको समान पहुँच, अपाङ्गता भएका बालबालिका तथा बालिकामैत्री शैक्षिक वातावरण निर्माण, विद्यालय र स्थानीय सरकारबीचको समन्वय तथा शिक्षा क्षेत्रको सुधारमा स्थानीय तहको भूमिकाबारे छलफल भएको थियो ।
दिव्य विकास स्रोत केन्द्र, पर्साका कार्यकारी निर्देशक रामाकान्त प्रसाद कुर्मीकाे अध्यक्षतामा भएकाे कार्यक्रममा जिराभवानी गाउँपालिकाका पाँचवटै वडाका वडाध्यक्ष तथा वडा प्रतिनिधि, शिक्षा शाखा प्रमुख, सामाजिक विकास शाखा प्रमुख र प्रशासन शाखा प्रमुखको सहभागिता रहेको थियो ।
त्यसैगरी श्री बितो महतो जनता माध्यमिक विद्यालय, जितपुर नौकाटोला, श्री नेपाल राष्ट्रिय माध्यमिक विद्यालय, सेढवा र श्री नेपाल राष्ट्रिय माध्यमिक विद्यालय, काठकुइया बसन्तपुरका प्रधानाध्यापक तथा बालिका तथा समावेशी सञ्जालका प्रतिनिधिहरूको समेत सहभागिता रहेको थियो ।
कार्यक्रमको सहजीकरण शिक्षाका लागि राष्ट्रिय अभियान (NCE Nepal) का राष्ट्रिय उपाध्यक्ष रामप्रवेश साहले गरेका थिए । उनले समावेशी तथा गुणस्तरीय शिक्षा सुनिश्चित गर्न स्थानीय सरकार, विद्यालय, समुदाय तथा सरोकारवाला निकायबीच प्रभावकारी समन्वय र सहकार्य आवश्यक रहेको बताए ।
कार्यक्रम सञ्चालन दिव्य विकास स्रोत केन्द्र, पर्साका सहायक कार्यक्रम अधिकृत नवलकिशोर साहले गरेका थिए ।
बैठकले स्थानीय तहमा समावेशी तथा गुणस्तरीय शिक्षाको प्रवर्द्धनका लागि सरोकारवालाबीचको सहकार्यलाई थप प्रभावकारी बनाउने तथा शिक्षा क्षेत्रमा देखिएका समस्या समाधानका लागि आगामी दिनमा समन्वयात्मक पहल गर्नेमा जोड दिएको छ ।
