वीरगंज । नेपाल औषधि तथा बिक्री प्रतिनिधि संघ (NMSRA) वीरगंज इकाईले आफ्नो ५७औँ स्थापना दिवस विभिन्न कार्यक्रम आयोजना गरी मनाएको छ । स्थापना दिवसको अवसरमा रक्तदान कार्यक्रमसँगै मेडिकल रिप्रेजेन्टेटिभ (एमआर)बाट व्यवस्थापक पदमा बढुवा भएका व्यक्तिहरूलाई सम्मान गरिएको हो ।
सामाजिक उत्तरदायित्वअन्तर्गत आयोजित रक्तदान कार्यक्रममा एक महिलासहित ५२ जनाले रक्तदान गरेको रक्तसञ्चार केन्द्र वीरगंजले जनाएको छ ।
रक्तदान गर्नेहरूमा किरण खत्री, दिपेन्द्र यादव, विकास कुशवाहा, बब्लु चौधरी, निरज श्रीवास्तव, गौरव पटेल, सुमित वर्णवाल, हिमांशु गुप्ता, राजन चौरसिया, चन्दन पटेल, करुण कुमार, केशव पाण्डे, राजन पटेल र शंकर सिंहलगायत रहेका थिए ।
संघका कोषाध्यक्ष दिपेन्द्र यादवका अनुसार स्थापना दिवसका अवसरमा सामाजिक उत्तरदायित्वलाई प्राथमिकता दिँदै रक्तदान कार्यक्रम आयोजना गरिएको हो । कार्यक्रममा यस वर्ष एमआर पदबाट म्यानेजर पदमा बढुवा भएका विभिन्न व्यक्तिहरूलाई समेत सम्मान गरिएको उनले बताए ।
NMSRA वीरगंज इकाईका अध्यक्ष सौरभ वर्णवालको अध्यक्षतामा सम्पन्न कार्यक्रममा नेपाल मेडिकल एसोसिएसनका अध्यक्ष डा. मनोजकुमार गुप्ता प्रमुख अतिथि रहेका थिए ।
कार्यक्रममा जिल्ला प्रहरी कार्यालय पर्साका प्रहरी उपरीक्षक (एसपी) पवनकुमार भट्टराई, नेपाल औषधि व्यवस्था विभाग मधेश प्रदेशका उपाध्यक्ष अजय यादव, महासचिव पपु झा, पिन वीरगंजका सचिव अवधेश साहलगायतको उपस्थिति रहेको थियो । कार्यक्रमको सहजीकरण संघका सचिव बब्लु चौधरीले गरेका थिए ।
