वीरगंज । नेपाल कम्युनिष्ट पार्टी (एमाले)का तर्फबाट पर्सा निर्वाचन क्षेत्र नम्बर–१ का प्रतिनिधिसभा सदस्य पदका उम्मेदवार प्रदीप यादवले वीरगञ्जमा तीव्र घरदैलो अभियानलाई निरन्तरता दिएका छन्।
शनिबार बिहान वीरगञ्ज महानगरपालिका–३० अन्तर्गत लालपर्सा र प्रसोतीपुर क्षेत्रमा आयोजित घरदैलो तथा जनता दर्शन कार्यक्रममा सयौँ स्थानीयको उल्लेख्य सहभागिता रहेको थियो। मतदाताहरूले यादवलाई फूलमाला र गम्छा ओढाएर भव्य स्वागत गरेका थिए।
पूर्व मन्त्रीसमेत रहेका यादवले मतदातासँग प्रत्यक्ष संवाद गर्दै आफ्ना विगतका दुई संसदीय कार्यकालमा सम्पन्न विकास निर्माणका कामहरूको मूल्याङ्कन गरेर मात्र मतदान गर्न आग्रह गरे। उनले भने, “१० वर्षअघि पर्सा–१ को अवस्था सम्झनुहोस्। सडक, विद्यालय, विवाह भवन, खेलमैदान, मसान घाट, मन्दिर र मस्जिदहरूको स्थिति कस्तो थियो? आज भएका परिवर्तनहरू तपाईंहरूले आफैँ देख्न सक्नुहुन्छ।”
यादवले आफू क्षेत्रको हरेक टोल, समस्या र आवश्यकताबारे जानकार उम्मेदवार भएको दाबी गर्दै चुनावी मौसममा मात्र देखिने नेताहरूबाट सचेत रहन आग्रह गरे। “पाँच वर्षमा एक पटक मत माग्न आउनेहरूले विकास गर्न सक्दैनन्। म सधैँ जनताको सुख–दुःखमा साथमा रहन्छु,” उनले बताए।
उनले राष्ट्रियता सुदृढीकरण, आर्थिक समृद्धि र समाजवाद उन्मुख विकासलाई प्राथमिक एजेन्डा बनाएको उल्लेख गरे। साथै गरिबी निवारण, रोजगारी सृजना, महिला सशक्तीकरण, युवा बेरोजगारी न्यूनीकरण, कृषि तथा पर्यटन प्रवर्द्धन, स्थानीय उद्योग स्थापना जस्ता कार्यक्रमहरूलाई अगाडि बढाउने प्रतिबद्धता जनाए।
सूर्य चुनाव चिन्हमा मतदान गरी एमाले उम्मेदवारहरूलाई विजयी बनाउन अपिल गर्दै उनले भने, “काम गरेर प्रमाणित नेतृत्वलाई मत दिनुहोस्, बहुरूपियाको पहिचान गर्नुहोस्।”
विगतमा दुई पटक सांसद निर्वाचित भइसकेका यादवले सडक निर्माण, विद्यालय तथा अस्पताल भवन विस्तार, मन्दिर–मस्जिद–धर्मशाला निर्माण, मसान घाट व्यवस्थापन, खानेपानी, सिँचाइ र विद्युत् विस्तार जस्ता क्षेत्रमा महत्वपूर्ण काम गरेको दाबी गरे। संसद्मा पटक–पटक पर्साका जनसरोकारका विषय उठाएको पनि उनले उल्लेख गरे।
कार्यक्रममा स्थानीयहरूले विभिन्न समस्या राखेपछि यादवले ती समस्याहरूलाई प्राथमिकताका साथ सम्बोधन गर्ने आश्वासन दिए। उनले वर्तमान राजनीतिक परिस्थितिप्रति चिन्ता व्यक्त गर्दै संविधान, सङ्घीयता र राष्ट्रिय अखण्डता जोगाउन एमाले नेतृत्वको सरकार आवश्यक रहेको धारणा राखे। साथै केपी शर्मा ओलीलगायत नेताहरूले विदेशी हस्तक्षेपको विरोध गर्दै राष्ट्रिय स्वाभिमानको पक्षमा अडान लिएको प्रसंग पनि उठाए।
कार्यक्रममा एमालेका केन्द्रीय तथा स्थानीय नेता, कार्यकर्ता, युवा, महिला र ज्येष्ठ नागरिकहरूको उल्लेख्य सहभागिता रहेको थियो।
