वीरगंज । पर्सा निर्वाचन क्षेत्र नम्बर १ बाट निर्वाचित प्रतिनिधिसभा सदस्य बुद्धिप्रसाद पन्त (हरि पन्त) सम्बन्धी प्रकाशित समाचारलाई लिएर सञ्चार संस्था तथा पत्रकारविरुद्ध विद्युतीय अपराधसम्बन्धी मुद्दा दर्ता गरी अदालतसम्म पुर्याइएको घटनाप्रति समाजवादी प्रेस संगठन नेपाल, पर्साले गम्भीर आपत्ति जनाएको छ ।
संगठनले आफ्ना सहसचिवसमेत रहेका रातोपाना डटकमका सञ्चालक श्याम सर्राफ, नेपाल पत्रकार महासंघ पर्सा शाखाका सदस्य तथा प्रहार डेली डटकमका सञ्चालक राहुल गुप्ता, पत्रकार महासंघका साधारण सदस्य एवं रातोपानाका प्रबन्ध निर्देशक अमित अग्रवाललगायतका सञ्चारकर्मी तथा सञ्चार संस्थाविरुद्ध मुद्दा दर्ता गरिएकोप्रति आपत्ति जनाएको हो ।
संगठनले सार्वजनिक पदमा रहेका व्यक्तिका काम, गतिविधि, अभिव्यक्ति तथा भूमिकाबारे नागरिकस्तरबाट उठेका प्रश्न र चासोलाई समाचारका रूपमा सार्वजनिक गर्नु पत्रकारिताको स्वाभाविक दायित्व भएको जनाएको छ । सांसद पन्तसँग सम्बन्धित विषयमा प्रकाशित समाचारमा सम्बन्धित पक्षको धारणा समेत सार्वजनिक गरिएको भन्दै संगठनले पत्रकारिताको मूल धर्म नै प्रश्न उठाउँदा सम्बन्धित पक्षको धारणा समेट्नु र तथ्यलाई सार्वजनिक बहसमा ल्याउनु रहेको उल्लेख गरेको छ ।
कुनै समाचारप्रति चित्त नबुझेमा सम्बन्धित सञ्चारमाध्यममा खण्डन वा प्रतिक्रिया दिने, प्रेस काउन्सिल नेपालमा उजुरी गर्ने तथा प्रचलित कानुनी प्रक्रिया अवलम्बन गर्ने वैधानिक बाटो हुँदाहुँदै पत्रकार तथा सञ्चारमाध्यमविरुद्ध मुद्दा दर्ता गर्ने र पक्राउ पुर्जी जारी गराउने कार्यप्रति संगठनले असहमति जनाएको छ ।
पत्रकारलाई त्रसित बनाउने तथा पेशागत मनोबल कमजोर पार्ने गरी कानुनी प्रक्रिया र राज्यका संयन्त्रको प्रयोग हुनु प्रेस तथा अभिव्यक्ति स्वतन्त्रताका लागि गम्भीर चुनौती भएको संगठनको भनाइ छ ।
संगठनका सचिव विनोद पटेलद्वारा जारी विज्ञप्तिमा पत्रकार तथा सञ्चारमाध्यमलाई अनावश्यक दबाब र त्रासमा पार्ने कार्य रोक्न, प्रेस तथा अभिव्यक्ति स्वतन्त्रताको सम्मान गर्न तथा समाचारप्रति असहमति भए विद्यमान कानुनी र संस्थागत प्रक्रियामार्फत समाधान खोज्न सम्बन्धित पक्षसँग माग गरिएको छ ।
