गरिमा हत्या प्रकरणमा दोषीलाई हदैसम्मको कारबाही गर्न नेकपा पर्साको माग

वीरगंज । जीतपुरसिमरा उपमहानगरपालिका–१ भक्तिनगरकी बालिका गरिमा कुमारी चौधरीको बलात्कारपछि हत्या भएको घटनाप्रति नेपाली कम्युनिष्ट पार्टी, (नेकपा) पर्सा जिल्ला समितिले गम्भीर आपत्ति जनाउँदै दोषीलाई कडा भन्दा कडा कारबाही गर्न सरकारसँग माग गरेको छ ।

पार्टीका जिल्ला संयोजक जय प्रकाश थारुद्वारा जारी प्रेस विज्ञप्तिमा सरस्वती आधारभूत विद्यालय, दक्षिणवयाह नर्सरीमा अध्ययनरत बालिका चौधरी साउन ३१ गते बिहानदेखि सम्पर्कविहीन भएको र खोजीका क्रममा भदौ २ गते आफ्नै घर नजिकैको एक घरमा विभत्स तथा अमानवीय अवस्थामा शव फेला परेको उल्लेख गरिएको छ ।

घटनाले पार्टीलाई स्तब्ध र मर्माहत बनाएको भन्दै विज्ञप्तिमा पछिल्लो समय तराईसहित देशका विभिन्न क्षेत्रमा बढ्दै गएका अमानवीय, क्रूर र जघन्य आपराधिक घटनाको घोर भर्त्सना गरिएको छ ।

यस्ता घटना रोक्न प्रहरी प्रशासन तथा सम्बन्धित निकायले उच्च सतर्कता अपनाउनुपर्ने भन्दै पार्टीले दोषीमाथि कडा कारबाही गर्न माग गरेको छ । साथै, सिमराको घटनापछि जनतामा त्रास र भय बढेको भन्दै आम नागरिकको जिउधन तथा भौतिक सुरक्षाको प्रत्याभूति दिलाउन सरकारसँग माग गरिएको छ ।

पार्टीले सबै समुदायलाई आपसी समन्वय र सतर्कता अपनाउँदै सुरक्षित रहन अपिल गरेको छ । साथै, बालिका गरिमा चौधरीप्रति भावपूर्ण श्रद्धाञ्जली अर्पण गर्दै शोकाकुल परिवारजनमा गहिरो समवेदना व्यक्त गरेको छ ।

यस्ता आपराधिक तथा अमानवीय घटना रोक्न आवश्यक परे नेपालको विद्यमान कानुन संशोधन गरेर भए पनि दोषीलाई हदैसम्मको कारबाही गर्न नेपाल सरकारसँग जोडदार माग गरिएको छ ।