काठमाडौँ । नेकपा (एमाले) का महासचिव शङ्कर पोखरेलले भूमिहीन, सुकुम्वासी तथा श्रमिक समुदायका भूमिसम्बन्धी समस्या समाधानका लागि राज्यका प्रयासलाई थप प्रभावकारी बनाउनुपर्ने बताउनुभएको छ ।

भूमि अधिकार तथा श्रमिक सङ्गठन, नेपालको १५औँ स्थापना दिवसका अवसरमा बुधबार आयोजित ‘नेपालमा भूमि समस्या समाधानका प्रयास, उपलब्धि र चुनौती’ विषयक अन्तरक्रियामा महासचिव पोखरेलले सरकारले सम्बन्धित स्थानीय तह, सरोकार भएका पक्षसँग सघन छलफल गरेर दीर्घकालीन रुपमा समस्याको समाधान गर्नुपर्ने बताउनुभएको हो ।

कार्यक्रममा सहभागीले भूमिहीनता र अव्यवस्थित बसोबासका कारण गरिब, सुकुम्वासी तथा श्रमिक समुदायले भोग्दै आएका समस्या, भूमि अधिकारको सुनिश्चितता तथा भूमि सुधारका प्रयासबारे छलफल गरेका थिए ।

उनीहरूले भूमि अधिकार सुनिश्चित नहुँदा सम्बन्धित समुदाय आधारभूत सेवा तथा सामाजिक–आर्थिक अवसरबाट समेत वञ्चित हुने अवस्था रहेको उल्लेख गर्दै समस्या समाधानका लागि प्रभावकारी नीति तथा कार्यक्रमको कार्यान्वयनमा जोड दिएका थिए ।

वीरगंज । वीरगंज महानगरपालिका–२१ सुखचैनास्थित श्री नेपाल राष्ट्रिय गीता गजेन्द्र जोशी माध्यमिक विद्यालयमा शिक्षक व्यवस्थापनका लागि मनोज ग्यास प्रालिले १ लाख ४४ हजार रुपैयाँ आर्थिक सहयोग गरेको छ । कम्पनीले वडा नम्बर २१ कै स्वास्थ्य चौकीलाई दुई थान एसीसमेत सहयोग गरेको छ ।

वीरगंज महानगरपालिका–२१ का वडाध्यक्ष राधाकृष्ण साह रौनियारको पहलमा मनोज ग्यास प्रालिका प्रबन्ध निर्देशक मनोज दासले विद्यालयलाई १ लाख ४४ हजार रुपैयाँको चेक हस्तान्तरण गरेका हुन् ।

कम्पनीले सामाजिक उत्तरदायित्वअन्तर्गत विद्यालयमा एक वर्षका लागि शिक्षक व्यवस्थापन गर्न उक्त रकम सहयोग गरेको जनाएको छ । विद्यालयमा शिक्षक अभावका कारण पठनपाठन प्रभावित हुन नदिन सहयोग गरिएको बताइएको छ ।

चेक हस्तान्तरण कार्यक्रममा विद्यालय व्यवस्थापन समितिका अध्यक्ष राजेश पटेल, प्रधानाध्यापक नन्दकिशोर राम, वडाध्यक्ष राधाकृष्ण साह रौनियार, समाजसेवी सरोज यादव, बच्चा महतो, ताराचन्द महतो, हृदयनारायण महतो, भोज महतो लगायतको उपस्थिति थियो ।

यसैगरी मनोज ग्यास प्रालिले वीरगंज महानगरपालिका–२१ स्थित स्वास्थ्य चौकीलाई दुई थान एसी पनि सहयोग गरेको छ । प्रबन्ध निर्देशक दासले वडाध्यक्ष रौनियारलगायतको रोहबरमा स्वास्थ्य चौकी प्रमुखलाई एसी हस्तान्तरण गरेका हुन् ।

विद्यालयमा शिक्षक व्यवस्थापन तथा स्वास्थ्य चौकीमा एसी जडानका लागि प्राप्त सहयोगले स्थानीयवासीलाई शिक्षा तथा स्वास्थ्य सेवा प्रदान गर्न थप सहज हुने अपेक्षा गरिएको स्थानीय समिर आलमले वताए ।

वीरगंज । पर्साको वीरगंज महानगरपालिका–१७ अलौबाट सशस्त्र प्रहरीले मोटरसाइकलको ट्याङ्कीभित्र फल्स बटम बनाएर लुकाइएको अवस्थामा करिब ९.५ किलो चरेसजस्तो देखिने पदार्थ बरामद गरेको छ ।

सशस्त्र प्रहरी बल, नेपाल सीमा सुरक्षा गुल्म अलौबाट खटिएको गाडी मोबाइल टोलीले मंगलबार शंकास्पद रूपमा आउँदै गरेको भारतीय नम्बर प्लेटको मोटरसाइकललाई जाँच गर्ने क्रममा ट्याङ्कीभित्र फल्स बटम बनाएर लुकाइएको अवस्थामा उक्त पदार्थ फेला पारेको हो ।

सशस्त्र प्रहरीका अनुसार मोटरसाइकलबाट २१ पोका बनाई लुकाइएको अन्दाजी ९.५ किलो चरेसजस्तो देखिने पदार्थ, एक थान मोबाइल र लागूऔषध ओसारपसारमा प्रयोग भएको मोटरसाइकल बरामद गरिएको छ ।

बरामद सामग्रीसहित एक जना भारतीय नागरिकलाई नियन्त्रणमा लिइएको सशस्त्र प्रहरीले जनाएको छ ।

नियन्त्रणमा लिइएका व्यक्ति तथा बरामद लागूऔषध, मोटरसाइकल र अन्य सामग्री आवश्यक अनुसन्धान तथा कानुनी कारबाहीका लागि वडा प्रहरी कार्यालय श्रीपुर, पर्सामा बुझाइएको सशस्त्र प्रहरी बल नेपाल नं. १३ गण हेडक्वार्टर पर्साका सूचना अधिकारी सशस्त्र प्रहरी नायब उपरीक्षक मोहनराज निरौलाले जानकारी दिए ।

बारा । बाराको जितपुरसिमरा उपमहानगरपालिका–२३ भलुहीस्थित सागर आयल पेट्रोल पम्प नजिकै गएराति ट्रकको ठक्करबाट दुई जनाको मृत्यु भएको छ।

वीरगञ्ज–पथलैया सडकखण्डमा ना.३ ख ५६१० नम्बरको एलपी ग्यास बोकेको ट्रकले ना।४३ प ५१२२ नम्बरको मोटरसाइकललाई ठक्कर दिँदा मोटरसाइकलमा सवार दुई जना गम्भीर घाइते भएका थिए।

मंगलबार राति करिब ८:३० बजे ऐरोटेक ग्यास कम्पनीबाट निस्किएको ट्रक सर्भिस लेन हुँदै एक्सप्रेस(वेतर्फ प्रवेश गर्ने क्रममा जितपुरबाट वीरगञ्जतर्फ जाँदै गरेको मोटरसाइकललाई ठक्कर दिएको प्रहरीले जनाएको छ।

दुर्घटनामा गम्भीर घाइते भएका दुवै जनालाई उपचारका लागि नारायणी अस्पताल वीरगञ्ज लगिएको थियो। अस्पताल पुर्‍याइएका उनीहरूलाई चिकित्सकले राति ९:१० बजे मृत घोषणा गरेका थिए।

मृत्यु हुनेमा पर्साको वीरगञ्ज महानगरपालिका–१६ नगवाका ३५ वर्षीय रवीन्द्र उपाध्याय र बाराको करैयामाई गाउँपालिका–७ का ३० वर्षीय दिलीप चौधरी रहेका छन्। मोटरसाइकल कसले चलाइरहेको थियो भन्ने विषयमा प्रहरीले अनुसन्धान गरिरहेको जनाएको छ।

दुर्घटनापछि इलाका प्रहरी कार्यालय जितपुरका प्रहरी नायब निरीक्षक उमेश निरौला र इलाका प्रहरी कार्यालय सिमराका प्रहरी निरीक्षक विनोदराज खत्रीको कमाण्डमा प्राविधिकसहितको टोली घटनास्थलमा पुगेर अनुसन्धान गरेको थियो।

प्रहरीले दुर्घटनामा संलग्न ट्रक र त्यसका चालक चितवनको भरतपुर महानगरपालिका–७ का ५८ वर्षीय सुनिलराज पाठकलाई नियन्त्रणमा लिएको छ। ट्रक र चालक इलाका प्रहरी कार्यालय सिमराको नियन्त्रणमा छन् भने मोटरसाइकल इलाका प्रहरी कार्यालय जितपुरमा राखिएको प्रहरीले जनाएको छ।

मृतक दुवैको शव परीक्षणका लागि नारायणी अस्पताल वीरगञ्जमा राखिएको छ।