काठमाडौं । राष्ट्रिय स्वतन्त्र पार्टी (रास्वपा) संसदीय दलले निर्धारित समयसीमाभित्र सम्पत्ति विवरण नबुझाउने आफ्ना २४ जना सांसदको नामावली सार्वजनिक गरेको छ ।
संसद् सचिवालयबाट पटक–पटक एसएमएसमार्फत ताकेता तथा पार्टी नेतृत्वबाट समेत फलोअप हुँदाहुँदै सम्पत्ति विवरण नबुझाउने सांसदहरूको सूची सार्वजनिक गरिएको हो ।
सार्वजनिक सूचीमा पर्सा क्षेत्र नं. ३ का सांसद रामाकान्त चौरसियासहित आशा झा (मोरङ–५), कन्हैया बनिया (रुपन्देही–४), कामिनी कुमारी (महोत्तरी) र कुसुम महर्जन (काठमाडौं) लगायत २४ जना सांसद रहेका छन् ।
सम्पत्ति विवरण बुझाउनु जनप्रतिनिधिको कानुनी दायित्वसँगै सार्वजनिक पदमा रहने व्यक्तिको पारदर्शितासँग जोडिएको विषय हो । निर्धारित समयभित्र विवरण नबुझाउने सांसदहरूको नाम सार्वजनिक भएपछि रास्वपाभित्रको आन्तरिक अनुशासन र कानुनी दायित्व पालना सम्बन्धी विषयमा समेत चर्चा बढेको छ ।
रास्वपाले पार्टीभित्रको अनुशासन तथा कानुनी प्रावधानको पालना प्रभावकारी बनाउन सम्पत्ति विवरण बुझाउने विषयमा सांसदहरूलाई पटक–पटक सचेत गराउँदै आएको जनाएको छ ।
