वीरगंज । जिल्ला प्रहरी कार्यालय पर्साको आयोजनामा प्रहरी अधिकृत तथा कर्मचारीलाई घामबाट हुने छालासम्बन्धी समस्या र फोटो प्रोटेक्सनबारे स्वास्थ्य अन्तरक्रिया कार्यक्रम सम्पन्न भएको छ ।
जिल्ला प्रहरी कार्यालय पर्साका प्रहरी प्रमुख प्रहरी उपरीक्षक (एसपी) पवनकुमार भट्टराईको प्रमुख आतिथ्यमा कार्यालयको सभाहलमा आयोजित कार्यक्रममा नारायणी अस्पतालका वरिष्ठ छाला तथा यौनरोग विशेषज्ञ डा. अभिषेक सुमनले घाम, पराबैंगनी किरण (यूभी) तथा वातावरणीय प्रभावका कारण छालामा देखिन सक्ने विभिन्न समस्याबारे जानकारी दिएका थिए ।
डा. सुमनले लामो समयसम्म प्रत्यक्ष घामको सम्पर्कमा रहँदा चाया–पोतो, सनबर्न, छालाको समयअगावै बुढ्यौली, एलर्जी लगायतका समस्या देखिन सक्ने भन्दै नियमित रूपमा छालाको सुरक्षा गर्न सुझाव दिए ।
उनले घामबाट छालालाई जोगाउन सनस्क्रिनको प्रयोग, आवश्यकताअनुसार टोपी तथा सुरक्षात्मक कपडाको प्रयोग र अत्यधिक घाममा लामो समय नबस्ने उपाय अपनाउनुपर्ने बताए । विशेषगरी बाहिरी ड्युटीमा खटिने प्रहरी कर्मचारीले आफ्नो स्वास्थ्यप्रति थप सचेत हुनुपर्ने उनको भनाइ थियो ।
कार्यक्रममा एसपी भट्टराईले प्रहरी कर्मचारीले जिम्मेवारी निर्वाहका क्रममा विभिन्न भौगोलिक तथा वातावरणीय परिस्थितिमा काम गर्नुपर्ने भएकाले स्वास्थ्यसम्बन्धी सचेतना कार्यक्रम महत्वपूर्ण रहेको बताए ।
प्रहरी संगठनलाई चुस्त, स्वस्थ र प्रभावकारी बनाउन कर्मचारीको शारीरिक तथा मानसिक स्वास्थ्यमा समेत ध्यान दिन आवश्यक रहेको उल्लेख गर्दै उनले यस्ता स्वास्थ्य अन्तरक्रिया कार्यक्रमलाई निरन्तरता दिनुपर्नेमा जोड दिए ।
कार्यक्रमको सहजीकरण प्रहरी निरीक्षक सोनी नेमाफुकीले गरेकी थिइन् । जिल्ला प्रहरी कार्यालय पर्साकाे सभा हलमा भएकाे कार्यक्रममा जिल्ला प्रहरी कार्यालय पर्साका प्रहरी अधिकृत तथा कर्मचारीको सहभागिता रहेको थियो ।
कार्यक्रममा टोरेन्ट फार्माका प्रतिनिधि दीपेन्द्र यादव, म्यानकाइन्ड फार्माका प्रतिनिधि चन्दन पटेल तथा बायोरम डर्माका प्रतिनिधि अभिषेक यादवको समेत उपस्थिति रहेको थियो ।
