वीरगंज । आम विद्यार्थी मोर्चाले मधेशका विद्यालयमा देखिएका शैक्षिक तथा भौतिक समस्याबारे शिक्षा मन्त्री सुस्मित पोखरेलसँग पाँचवटा खुला प्रश्न गर्दै तत्काल सुधारका लागि ठोस योजना सार्वजनिक गर्न माग गरेको छ ।
मोर्चाका सचिव प्रिन्स साहले प्रेस विज्ञप्ति जारी गर्दै मधेशका विद्यालयमा विद्यार्थीको अनुपातमा शिक्षक दरबन्दी नरहेको, तहगत तथा विषयगत शिक्षकको अभाव रहेको भन्दै यसको समाधानका लागि मन्त्रालयले गरिरहेको पहल स्पष्ट पार्न माग गरेका छन् ।
मोर्चाले मधेशका धेरै विद्यालयमा आवश्यक भवन, छात्र–छात्राका लागि छुट्टाछुट्टै शौचालय, शुद्ध खानेपानी तथा आवश्यक शैक्षिक सामग्रीको अभाव रहेको जनाएको छ । सामान्य ब्ल्याकबोर्ड तथा ह्वाइटबोर्डसमेत पर्याप्त नभएको अवस्थामा बालबालिकाले गुणस्तरीय शिक्षा कसरी पाउने भन्ने प्रश्न मोर्चाले उठाएको छ ।
त्यस्तै, विद्यालयमा आर्थिक अनियमितता तथा आय–व्ययमा पारदर्शिताको अभाव रहेको आरोप लगाउँदै मोर्चाले विद्यालयको आन्तरिक आम्दानी पारदर्शी बनाउन, सरकारी लेखापरीक्षण सुनिश्चित गर्न तथा विद्यार्थीको खाजाका लागि आउने रकममा हुने भनिएको अनियमितताबारे निष्पक्ष छानबिन गरी दोषीमाथि कारबाही गर्न माग गरेको छ ।
संविधानले आधारभूत शिक्षालाई निःशुल्क र अनिवार्य गरेको भए पनि विद्यालयहरूले विभिन्न शीर्षकमा शुल्क उठाउने गरेको भन्दै मोर्चाले त्यसलाई रोक्न मन्त्रालयले लिने कदमबारे स्पष्ट जवाफ मागेको छ ।
मधेशमा गुणस्तरीय शिक्षाको संकट रहेको उल्लेख गर्दै आम विद्यार्थी मोर्चाले गरिब तथा विपन्न समुदायका बालबालिकालाई गुणस्तरीय शिक्षा उपलब्ध गराउन शिक्षा मन्त्रालयसँग ठोस र स्पष्ट कार्ययोजना माग गरेको छ ।
‘हामीलाई आश्वासन होइन, विद्यालयको कक्षाकोठामा परिवर्तन चाहिएको छ,’ विज्ञप्तिमा भनिएको छ । मोर्चाले उठाएका पाँचवटै प्रश्नको शिक्षा मन्त्रीबाट स्पष्ट र ठोस जवाफको अपेक्षा गरेको जनाएको छ ।
