सप्तरी । सप्तरीको बलान बिहुल गाउँपालिका–४ बेल्हीमा २४ वर्षीय अभिनन्द यादवलाई घरबाटै लगिएको भन्दै आफन्त तथा स्थानीयवासीले प्रहरी चौकी घेराउ गरेका छन्।
परिवारका अनुसार सोमबार राति करिब १२ बजेतिर ६–७ जनाको समूह घरमा पुगेको थियो। उनीहरूले परिवारका सदस्यलाई पेस्तोल देखाएको र सुतिरहेका अभिनन्दलाई आफ्नो नियन्त्रणमा लिएर गएको उनका काका अमोद यादवले बताएका छन्।
घटनाबारे प्रहरीलाई जानकारी गराए पनि तत्काल खोजी तथा आवश्यक पहल नभएको भन्दै आफन्त र स्थानीयवासी मंगलबार बेल्हीस्थित प्रहरी चौकी पुगेका थिए। उनीहरूले अभिनन्दको अवस्था तत्काल सार्वजनिक गर्न र खोजी कार्यलाई तीव्र बनाउन माग गरेका छन्।
बलान बिहुल गाउँपालिका–४ का वडाध्यक्ष लक्ष्मीनारायण झाले गाउँमै प्रहरी चौकी र सशस्त्र प्रहरीको बीओपी रहेको अवस्थामा घरबाटै युवकलाई लगिएको भनिएको घटना गम्भीर भएको बताएका छन्। उनले युवकको खोजी गरी घटनाको वास्तविकता बाहिर ल्याउन प्रहरीसँग आग्रह गरेका छन्।
यता, जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक हेमराज घिमिरेले अभिनन्दको खोजी भइरहेको बताएका छन्।
प्रहरीका अनुसार प्रारम्भिक सूचनामा अभिनन्द भारतमा गम्भीर प्रकृतिको अपराधमा संलग्न रहेको र भारतीय प्रहरीले उनलाई नियन्त्रणमा लिएर गएको भन्ने जानकारी प्राप्त भएको छ। यद्यपि, यसबारे थप विवरण पुष्टि गर्ने काम भइरहेको प्रहरीले जनाएको छ।
घरमा पेस्तोलसहितको समूह आएको भन्ने परिवारको दाबीबारे भने प्रहरीलाई औपचारिक जानकारी नभएको प्रवक्ता घिमिरेले बताएका छन्। भारतीय पक्षबाट भएको भनिएको नियन्त्रण र घटनाको वास्तविक अवस्थाबारे थप जानकारी लिन नेपाली प्रहरीले सम्बन्धित पक्षसँग समन्वय गरिरहेको जनाएको छ।
