वीरगंज । विशेष अदालतबाट सफाइ पाएपछि स्वतः पुनर्बहाली भएका वीरगंज महानगरपालिकाका मेयर राजेशमान सिंहले तीन महिनापछि बुधबार महानगरपालिका कार्यालय पुगेर पुनः पदभार ग्रहण गरेका छन्।
अख्तियार दुरुपयोग अनुसन्धान आयोगले गत जेठ २५ गते सिंहविरुद्ध छोरीको नागरिकता बनाउँदा गलत लिखत पेस गरेको आरोपमा विशेष अदालतमा मुद्दा दायर गरेपछि उनी मेयर पदबाट निलम्बनमा परेका थिए । विशेष अदालतले मंगलबार सिंहलाई सफाइ दिएपछि उनी स्वतः मेयर पदमा पुनर्बहाली भएका हुन् ।
बुधबार महानगरपालिका कार्यालय पुगेका सिंहले आफ्नो कार्यकक्षमा हिन्दु धार्मिक विधिअनुसार पूजापाठ गरेपछि औपचारिक रूपमा पदभार ग्रहण गरेका हुन् । पदभार ग्रहणपछि कर्मचारी तथा समर्थकलाई सम्बोधन गर्दै सिंहले आफूविरुद्ध व्यक्तिगत रिसइबी र राजनीतिक प्रतिशोधका कारण झूटा आरोप लगाइएको दाबी गरे ।
विशेष अदालतले आफूविरुद्ध लगाइएका आरोप खारेज गरेर न्याय दिएको भन्दै उनले खुसी व्यक्त गरे । वीरगंजवासीको शिर निहुरिने कुनै काम आफूले नगरेको उनको दाबी थियो ।
‘मैले भ्रष्टाचार गरेको भए सजायको भागीदार हुन्थेँ । तर मेयर पदमा रहँदा कुनै खराब काम गरेको छैन, गर्दिनँ पनि,’ सिंहले भने, ‘वीरगंजवासीको शिर झुक्ने काम मबाट हुन दिन्नँ ।’
वीरगंजलाई ‘वैभव वीरगंज’ बनाउने अभियान देख्न नचाहनेहरूले आफूलाई दुःख दिएको आरोप लगाउँदै सिंहले अब जनताले त्यस्ता प्रवृत्तिको जवाफ दिने बताए । उनले आफ्नो कार्यकालमा कुनै भ्रष्टाचार भएको भए सम्बन्धित सबै फाइल लिएर अनुसन्धान गर्न विपक्षीहरूलाई चुनौतीसमेत दिए ।
तीन महिना आफू मेयर पदमा नरहँदा महानगरपालिकाका केही कर्मचारीले सेवाग्राहीलाई अनाहकमा दुःख दिएको गुनासो आएको भन्दै सिंहले कर्मचारीलाई आफ्नो कार्यशैली सुधार्न चेतावनी दिए ।
महानगरपालिकामा राजस्व तिर्नसमेत सेवाग्राहीलाई एक सातासम्म झुलाउने गरिएको गुनासो आएको उल्लेख गर्दै उनले कर्मचारीलाई जिम्मेवारीपूर्वक काम गर्न निर्देशन दिए । गलत काम गर्ने कर्मचारीलाई अब छुट नदिने उनको भनाइ थियो ।
मेयर सिंहले आफ्नो अनुपस्थितिमा रोकिएका विकास निर्माणका कामसँगै शहरको सरसफाइ, सौन्दर्यीकरण, बजार व्यवस्थापनलगायतका योजनाले अब पुनः गति लिने बताए।
पदभार ग्रहण कार्यक्रममा पूर्वमन्त्री प्रदीप यादवले वीरगंजवासीको आशीर्वाद र मायाका कारण सिंह पुनः मेयर पदमा फर्किन सफल भएको बताए । अन्याय भएको ठाउँमा न्याय अवश्य प्राप्त हुने उल्लेख गर्दै यादवले विशेष अदालतको फैसलाले सिंहसँगै वीरगंजवासीले पनि न्याय पाएको बताए ।
