काठमाडौँ । नेपाली कांग्रेसका महामन्त्री गगन थापाले निष्पक्ष निर्वाचन र संविधानको रक्षा आजको मुख्य जिम्मेवारी भएको बताएका छन् ।
जेन–जी युवाहरूको आन्दोलनपछि देश नयाँ राजनीतिक मोडमा पुगेको भन्दै उनले नेपाली कांग्रेसले वास्तविकता स्वीकार गरी तोकिएको समयमा निर्वाचन सम्पन्न गराउन अग्रसर हुनुपर्ने बताएका हुन्।
थापाले सोमबार एक सार्वजनिक वक्तव्य जारी गर्दै अन्तरिम सरकार गठन भइसकेको र निर्वाचनको मिति घोषणासमेत भएको अवस्थामा नेपाली कांग्रेसले लोकतान्त्रिक शक्तिको रूपमा निर्वाचन सुनिश्चित गर्ने दायित्व लिनुपर्ने बताएका छन्। “सरकार बिचलित वा अलमलियो भने खवरदारी गरौं, तर निर्वाचन समयमै र निष्पक्ष होस् भन्नेमा सबै लागौं,” उनले भने।
उनले आन्दोलनपश्चात राज्यद्वारा भएको दमनलाई अक्षम्य ठहर गर्दै छानबिन र दोषीमाथि कारबाहीको माग दोहोर्याएका हुन् । साथै, आन्दोलनका क्रममा भएका आगजनी, विध्वंश र क्षतिपूर्तिको वास्तविक मूल्यांकन गरी कानुनी कारबाहीमा जोड दिनुपर्ने बताएका छन् ।
पार्टीभित्र आमूल सुधारको आवश्यकता औंल्याउँदै थापाले सदस्यता, संगठन र नेतृत्व चयन प्रक्रियामा पूर्ण परिवर्तन गर्नुपर्नेमा जोड दिए । “पार्टी पुनर्गठनका लागि म स्वयं महामन्त्री पद छोड्न तयार छु,” थापाको भनाइ छ।
संविधान र लोकतान्त्रिक संस्थाको रक्षा, स्थानीय तहको पुनर्निर्माण र सेवाप्रवाहलाई प्रभावकारी बनाउन उनले पार्टीका सबै तहलाई सक्रिय हुन आह्वान गरे।
वक्तव्यको अन्त्यमा थापाले आन्दोलनमा घाइते र मृतक परिवारप्रति समवेदना प्रकट गर्दै “निर्दोष युवाहरूको बलिदान खेर जान नदिने” प्रतिबद्धता जनाएका छन्।
