वीरगंज । दुई महिनादेखि तलब नपाएको भन्दै वीरगञ्ज महानगरपालिकाका कर्मचारीहरूले बिहीबार लेखा शाखामा तालाबन्दी गरेका छन्। दैनिक ज्यालादारी, करार तथा केही स्थायी कर्मचारीले संयुक्त रूपमा आन्दोलन गर्दै सबै कर्मचारीलाई समान रूपमा तलब भुक्तानी गर्न माग गरेका हुन्।

सरकारले १५ दिनभित्र कर्मचारीको तलब भुक्तानी गर्ने प्रतिबद्धता जनाएको भए पनि आफूहरूले अझै तलब नपाएको भन्दै कर्मचारीहरू आन्दोलनमा उत्रिएका हुन्। आर्थिक वर्षको अन्तिम भुक्तानी हुने दिनसमेत तलब पाउने सुनिश्चितता नदेखिएपछि उनीहरूले लेखा शाखामा तालाबन्दी गरेका छन्।

महानगरपालिकाको आन्तरिक राजस्व अपेक्षाअनुसार संकलन हुन नसकेपछि स्थायी कर्मचारीलाई मात्र एक महिनाको तलब भुक्तानी गर्ने तयारी भइरहेको सूचना पाएपछि अन्य कर्मचारी आन्दोलित बनेका हुन्। आन्दोलनरत कर्मचारीहरूले करार, दैनिक ज्यालादारी र स्थायी सबै कर्मचारीलाई समान रूपमा जेठ महिनासम्मको तलब एकैपटक भुक्तानी गर्नुपर्ने माग राखेका छन्।

महानगरपालिकाका लेखा अधिकृत रुपनारायण राउतका अनुसार स्थायी कर्मचारीको जेठ महिनाको तलब भुक्तानीका लागि करिब १ करोड ७० लाख रुपैयाँ बराबरको भौचर तयार भइसकेको थियो। तर कर्मचारीहरूले लेखा शाखामा तालाबन्दी गरेपछि सम्पूर्ण भुक्तानी प्रक्रिया रोकिएको उनले बताए।

उनका अनुसार महानगरपालिकामा मासिक तलब तथा भत्तामा करिब ३ करोड ८६ लाख रुपैयाँ खर्च हुने गरेको छ। तालाबन्दीपछि वीरगञ्ज महानगरपालिकाका कार्यवाहक प्रमुख इम्तियाज आलम र आन्दोलनरत कर्मचारीबीच समस्या समाधानका लागि छलफल भइरहेको जनाइएको छ।

यसैबीच, आर्थिक वर्षको अन्तिम दिन भएकाले संघीय सरकारबाट प्राप्त शिक्षा तथा स्वास्थ्य क्षेत्रअन्तर्गतका सशर्त अनुदान समयमै भुक्तानी हुन नसके महानगरपालिकाले ठूलो आर्थिक क्षति बेहोर्नुपर्ने अवस्था देखिएको छ। महानगरका एक कर्मचारीका अनुसार तोकिएको समयभित्र खर्च प्रक्रिया पूरा हुन नसके करिब ७ करोड रुपैयाँ बराबरको स्रोत व्यवस्थापन प्रभावित हुन सक्ने जोखिम रहेको छ।

लेखा अधिकृत राउतका अनुसार आर्थिक ऐनबमोजिम संघीय प्रणालीअन्तर्गत प्राप्त सशर्त कार्यक्रमको बजेट असार २५ गते राति १२ बजेसम्म अनिवार्य रूपमा भुक्तानी गरिसक्नुपर्ने व्यवस्था छ। निर्धारित समयभित्र खर्च हुन नसके बाँकी रहेको सशर्त अनुदान संघीय तथा प्रदेश सरकारलाई फिर्ता गर्नुपर्ने कानुनी व्यवस्था रहेको उनले बताए।

यता आन्दोलनरत कर्मचारीहरूले करार, दैनिक ज्यालादारी (डोरहाजिर) र स्थायी सबै कर्मचारीको जेठ महिनासम्मको तलब एकैपटक भुक्तानी गर्ने लिखित सुनिश्चितता नभएसम्म तालाबन्दी नखोल्ने अडान लिएका छन्।

वीरगंज । वीरगंजकाे मुख्य सडक विस्तार अभियान अन्तर्गत बुधबार पनि डोजर सञ्चालन गरिएको छ । अभियानको तेस्रो दिन मुर्ली चोकदेखि जिल्ला प्रहरी कार्यालयसम्मका सडकका २५/२५ मिटर दायाँ–बायाँका संरचना हटाउने कार्य अघि बढाइएको हो ।

सडक डिभिजन कार्यालय, हेटौंडाको नेतृत्वमा सञ्चालन भइरहेको अभियानमा बुधबार आधा दर्जन डोजर परिचालन गरी सडक क्षेत्रभित्र पर्ने संरचना खाली गराइएको छ । सोमबारदेखि सुरु भएको सडक विस्तार अभियानलाई निरन्तरता दिँदै सडक अतिक्रमण हटाउने कार्य तीव्र पारिएको हो ।

सडक डिभिजन कार्यालयले वीरगंजकाे मुख्य सडकमा दोस्रो पटक डाेजर अभियान सञ्चालन गरेको हो । यसअघि पनि सडक क्षेत्रभित्र बनेका संरचना हटाइएको थियो ।

सडक विस्तार सम्पन्न भएपछि यातायात व्यवस्थापन सहज हुने, ट्राफिक जाम न्यूनीकरण हुने तथा सहरको सौन्दर्यसमेत बढ्ने अपेक्षा गरिएको छ । बिहिबार पनि डाेजरले वीरगंजकाे घण्टाघर क्षेत्रकाे संरचनाहरु डाेजरले हटाइने सडक डिभिजन कार्यालयले जनाएकाे छ ।

वीरगंज । वीरगंज महानगरपालिकाले सहरलाई सफा, सुन्दर, हराभरा तथा व्यवस्थित बनाउने उद्देश्यले गठन गरेको ‘एक्सन टिम’को नेतृत्व सरसफाइ प्रमुख सरफुद्दिन मियाँलाई जिम्मा दिएको छ ।

सोमबारदेखि जिम्मेवारी सम्हालेका मियाँको नेतृत्वमा सहरका विभिन्न क्षेत्रमा सरसफाइलाई तीव्रता दिनुका साथै सडकपेटी (फुटपाथ) अतिक्रमण हटाउने विशेष अभियान सञ्चालन गरिने महानगरपालिकाका कार्यवाहक प्रमुख इम्तियाज आलमले जानकारी दिए ।

जिम्मेवारी हस्तान्तरणका क्रममा कार्यवाहक प्रमुख आलमले सहरमा कुनै पनि प्रकारको अतिक्रमण र फोहोर हुन नदिन तथा महानगरले सञ्चालन गरिरहेका सरसफाइ तथा व्यवस्थापनका कार्यमा कुनै कमजोरी हुन नदिन एक्सन टिमलाई निर्देशन दिए । उनले अभियान मुख्य सडकमा मात्र सीमित नरही महानगरका सबै ३२ वटै वडामा प्रभावकारी रूपमा सञ्चालन गरिने बताए ।

उनले महानगरको गरिमा कायम राख्न, नागरिकको स्वास्थ्य सुरक्षा सुनिश्चित गर्न तथा दैनिक जीवनमा देखिएका सरसफाइ र अतिक्रमणसम्बन्धी समस्याको समाधानमा परिणाममुखी ढंगले काम गर्न निर्देशन दिँदै नागरिकमैत्री सेवा प्रवाहमा जोड दिए ।

महानगरपालिकाका अनुसार एक्सन टिमले नियमित सरसफाइ, फुटपाथ अतिक्रमण हटाउने, सार्वजनिक स्थानको व्यवस्थापन तथा सहरको सौन्दर्यीकरणका कार्यक्रमलाई प्राथमिकताका साथ अघि बढाउनेछ ।

वीरगञ्ज । वीरगंजकाे मुख्य सडकअन्तर्गत २५/२५ मिटर सडक सीमाभित्र रहेका अतिक्रमित संरचना हटाउने अभियान मंगलबार पनि जारी रहेको छ । सडक डिभिजन कार्यालय हेटौंडाले पावर हाउसदेखि मुर्ली क्षेत्रसम्म डोजर परिचालन गरी सडक सीमाभित्र परेका घर तथा अन्य संरचना हटाएको हो ।

कार्यालयले मंगलबार अभियानका लागि सात वटा डोजर परिचालन गरेको जनाएको छ । कार्यालयका इन्जिनियर तथा वीरगंजका लागि फोकल पर्सन दुर्गाप्रसादका अनुसार एउटा डोजर उच्च अदालत क्षेत्र र बाँकी छ वटा डोजर मुर्ली क्षेत्रमा परिचालन गरिएको छ ।

उनका अनुसार मंगलबार दिउँसो साढे ३ बजेसम्म गण्डकदेखि मुर्ली क्षेत्रसम्म करिब ७० वटा निजी भवन तथा संरचना हटाइसकिएको छ । सो क्षेत्रमा रहेका आधा दर्जन सरकारी भवनका संरचनामा भने हाल डोजर नचलाइएको उनले बताए ।

त्रिभुवन राजमार्गअन्तर्गत पर्ने वीरगंजकाे मुख्य सडक क्षेत्रमा सडक सीमा अतिक्रमण गरी निर्माण गरिएका संरचना हटाउन सडक डिभिजन कार्यालयले गत शुक्रबारदेखि अभियान सुरु गरेको थियो । कृषि औजार कारखानासम्मका संरचना हटाइसकेपछि बहुअरी क्षेत्रका स्थानीयले अवरोध गरेपछि शुक्रबार साँझ अभियान रोकिएको थियो ।

पछि सोमबार बिहान साढे ६ बजेदेखि पुनः अभियान सञ्चालन गर्दै कार्यालयले अतिक्रमण हटाउने कार्यलाई निरन्तरता दिएको हो । पावर हाउसबाट मुर्ली चोकतर्फ डोजर अघि बढेसँगै धेरै घरधनीले डोजर पुग्नुअघि नै आफ्ना सडक सीमाभित्र रहेका पर्खाल, सटर र अन्य संरचना स्वयं हटाउन थालेका छन् ।