काठमाडौं । सुनसरीको देवानगञ्ज गाउँपालिका–१ मा गोली चलेको छ। गोली लागेर एक जना घाइते भएको प्रहरीले जनाएको छ।
सुनसरी जिल्ला प्रहरी कार्यालयका डीएसपी चन्द्र खड्काका अनुसार गोली लागेर एक जनाको तिघ्रामा चोट लागेको खबर प्राप्त भएको छ। घाइतेको अवस्था र पहिचानबारे भने थप विवरण खुल्न बाँकी छ।
गोली के कारणले चलेको हो भन्नेबारे अहिलेसम्म खुल्न सकेको छैन। स्थानीयवासीले गोली चलेको खबर गरेपछि प्रहरी टोली घटनास्थलतर्फ पठाइएको प्रमुख जिल्ला अधिकारी ईश्वरीप्रसाद अर्यालले जानकारी दिए।
घटनास्थलमा प्रहरी टोली पुगेर घटनाबारे थप अनुसन्धान तथा जानकारी संकलन गरिरहेको छ। गोली चलाउने व्यक्ति तथा घटनाको कारणबारे समेत प्रहरीले अनुसन्धान गरिरहेको जनाएको छ।
