काठमाडौँ । प्रधानमन्त्री सुशीला कार्कीले पदभार ग्रहण गरेपछि आज राष्ट्रका नाममा पहिलो सम्बोधन गर्दै आगामी छ महिनाभित्र प्रतिनिधिसभा निर्वाचन सम्पन्न गराउने सरकारको दायित्व रहेको बताउनुभएको छ।

भदौ २३ र २४ गतेको जेनजी समूहको आन्दोलन र त्यसपछि उत्पन्न परिस्थितिमा पूर्वप्रधानन्यायाधीश कार्कीको नेतृत्वमा भदौ २७ गते आन्तरिक सरकार गठन भएको थियो। सो सरकारलाई आगामी निर्वाचन सम्पन्न गराउने जिम्मेवारी दिइएको छ।

सिंहदरबारबाट पहिलो पटक राष्ट्रका नाममा सम्बोधन गर्दै प्रधानमन्त्री कार्कीले तोकिएको मिति आगामी फागुन २१ गते स्वच्छ, निष्पक्ष, स्वतन्त्र र भयरहित प्रतिनिधिसभा निर्वाचन सम्पन्न गर्न सरकार कटिबद्ध रहेको बताउनुभयो।

उहाँले विदेशमा रहेका नेपाली मतदातालाई मतदान गराउने उपाय खोजी भइरहेको जानकारी दिँदै युवापुस्ताको चाहना अनुसार योग्य व्यक्तिहरूलाई निर्वाचित गराउन सबैलाई उत्साहका साथ निर्वाचनमा सहभागी हुन आह्वान गर्नुभयो।

काठमाडौँ । सरकारले अनलाइन सञ्चारमाध्यमको दर्ता र नवीकरण पूर्ववत् रुपमा सूचना तथा प्रसारण विभागबाट गराउने निर्णय गरेको छ । प्रधानमन्त्री तथा मन्त्रिपरिषद्को कार्यालय सिंहदरबारमा आज भएको मन्त्रिपरिषद् बैठकको निर्णय सार्वजनिक गर्नुहुँदै सञ्चार तथा सूचना प्रविधिमन्त्री जगदीश खरेलले सो जानकारी दिनुभएको हो ।

पूर्ववर्ती सरकारले स्थानीय प्रशासन कार्यालयबाट अनलाइनको दर्ता र नवीकरण गराउने निर्णय गरेको थियो । बैठकले नेपाल सरकारको प्रवक्तामा सञ्चार तथा सूचना प्रविधिमन्त्री खरेललाई तोक्ने निर्णय गरेको पनि उहाँले जानकारी दिनुभयो ।

यसैगरी, आफू सहभागी मन्त्रिपरिषद्को पहिलो बैठकमा सञ्चार क्षेत्रसँग सम्बन्धित अन्य केही निर्णय भएको र बाँकी निर्णय शुक्रबार हुने नियमित पत्रकार सम्मेलनमा जानकारी गराइने सञ्चारमन्त्री खरेलले बताउनुभयो ।

काठमाडौँ । निर्वाचन आयोगले आगामी फागुन २१ गते हुने प्रतिनिधिसभा सदस्य निर्वाचनमा मतदान गर्न पाउने मतदाताको उमेर सम्बन्धी मापदण्ड स्पष्ट पारेको छ। आयोगका अनुसार संवत २०८२ साल फागुन २० गतेसम्म १८ वर्ष पूरा गर्ने नेपाली नागरिकले मतदान गर्न पाउने छन्।

आयोगले बिहिबार प्रेस विज्ञप्ति जारी गर्दै १६ वर्ष पूरा गरी नागरिकता प्राप्त गरेका नेपाली नागरिकले मतदाता नामावलीमा नाम दर्ता गर्न सक्ने जानकारी दिएको छ । नेपाल संविधानको धारा ८४ को उपधारा ५ अनुसार १८ वर्ष पूरा गरेका नागरिकलाई मात्र मतदान गर्ने अधिकार छ।

आयोगका सहसचिव एवं प्रवक्ता नारायणप्रसाद भट्टराईद्वारा जारी विज्ञप्तिमा उल्लेख छ, “१६ वर्ष पूरा गरी नागरिकता प्राप्त गरेका नेपाली नागरिकले मतदाता नामावलीमा नाम दर्ता गर्न सक्ने र मतदाता नामावलीमा नाम दर्ता भएकामध्ये संवत २०८२ साल फागुन २० गतेसम्म १८ वर्ष पूरा हुने नेपाली नागरिकले मात्र फागुन २१ गते सम्पन्न हुने प्रतिनिधिसभा सदस्य निर्वाचनमा मतदान गर्न पाउनेछन्।”

आयोगले आगामी निर्वाचनलाई निष्पक्ष, पारदर्शी र सहभागीमूलक बनाउन मतदाता दर्ता र अद्यावधिक कार्यमा नागरिकलाई सक्रिय सहभागिता जनाउन आग्रह गरेको छ।