वीरगंज । जेनजी आन्दोलनका क्रममा पर्साको जगरनाथपुर गाउँपालिका वडा नं. १ पिडारी टोलस्थित ऐलानी जग्गामा रोपिएका विरुवाहरू अराजक समूहले राति उखालेर फालेपछि गाउँपालिकाले पुनः वृक्षारोपण गरेको छ।
गाउँपालिकाले गत भदौं १ गते करिब आठ बिघा जग्गामा विभिन्न प्रजातिका विरुवाहरू रोपेको थियो । तर गत भदौं २४ गते राति राजनीतिक प्रतिशोधको कारण २ हजार ५ सयभन्दा बढी विरुवाहरू उखालिएको वा भाँचिएको थियो ।
त्यही स्थानमा अहिले गाउँपालिका अध्यक्ष श्रीकान्त प्रसाद यादवको अगुवाइमा आँप, कटहर, जामुन, खयरलगायतका नयाँ विरुवाहरू रोपिएको छ।
नयाँ विरुवा रोपिएको स्थलमा बिहीबार अध्यक्ष यादवको आग्रहमा पर्साका प्रमुख जिल्ला अधिकारी तोय नारायण सुबेदी, सशस्त्र प्रहरी उपरीक्षक पुरनचन्द्र भट्टलगायतका सुरक्षा अधिकारीहरूको टोलीले स्थलगत निरीक्षण गरेका छन् ।
अध्यक्ष यादवका अनुसार गाउँपालिकाले वातावरण संरक्षण र वृक्षारोपण अभियानलाई निरन्तरता दिँदै आएको छ । पिडारीको ऐलानी जग्गामा भएको वृक्षारोपणमा केही व्यक्तिहरूले राजनीतिक प्रतिशोध साँध्न विरुवाहरू उखाल्ने कार्य गरे पनि गाउँपालिकाले पुनः वृक्षारोपण गरी वातावरण संरक्षणप्रतिको आफ्नो प्रतिबद्धता देखाएको बताए ।
