वीरगंज । सशस्त्र प्रहरी बल नेपाल नं. १३ गण, पर्साले पर्साका विभिन्न स्थानबाट करिब दुई लाख ५० हजार बराबरको सामान नियन्त्रणमा लिई भन्सार कार्यालयमा बुझाएको छ।
सशस्त्र प्रहरीका अनुसार बिहिबार प्रस्तावित सीमा सुरक्षा गुल्म वीरगंजबाट खटिएको टोलीले वीरगंज महानगरपालिका–१६ स्थित विभिन्न सीमानाका बिन्दुहरूबाट भारतबाट अबैध रूपमा नेपाल भित्र्याइँदै गरेको करिब एक लाख ८६ हजार ४४० बराबरको कपडा र किराना सामान बरामद गरेको हो ।
त्यसैगरी सोही गुल्मबाट खटिएको अर्को टोलीले भन्सार मेनगेटबाट नेपालबाट मोटरसाइकलमार्फत भारततर्फ लैजाँदै गरेको ३ हजार १५० बराबरको मदिरा नियन्त्रणमा लिएको छ।
प्रस्तावित सीमा सुरक्षा गुल्म अलौबाट खटिएको टोलीले पर्साको बिन्दवासिनी गाउँपालिका–१, गर्दौलाबाट भारतबाट अबैध रुपमा ल्याउँदै गरेको करिब ५० हजार एक सय बराबरको पशु चौपाया तथा सुरक्षा बेस बेलवाबाट खटिएको टोलीले रु. १०,५५० बराबरको सामान बरामद गरेको जनाएको छ ।
सशस्त्र प्रहरीले बरामद गरिएका सबै सामान बिहिबार नै आवश्यक कारबाहीको लागि वीरगंज भन्सार कार्यालयमा बुझाएको सशस्त्र प्रहरी बल नेपाल नं. १३ गण पर्साका सूचना अधिकारी प्रहरी नायव उपरीक्षक सुरज कार्कीले जानकारी दिए ।
