वीरगंज । नेपाल रेडक्रस सोसाइटी रानीघाट उपशाखाद्वारा शुक्रबार रानीघाटस्थित दुर्गा पूजा सेवा समितिको पूजा पण्डालमा निःशुल्क स्वास्थ्य शिविर तथा औषधि वितरण कार्यक्रम सम्पन्न गरिएको छ।
शिविरमा १५० भन्दा बढी सर्वसाधारणले विभिन्न स्वास्थ्य परामर्श तथा उपचार सेवाको लाभ लिएका छन्। स्वास्थ्य परीक्षणपछि बिरामीहरूलाई निःशुल्क औषधिहरू वितरण गरिएको थियो।
कार्यक्रमको अध्यक्षता नेपाल रेडक्रस सोसाइटी रानीघाट उपशाखाका सभापति शतिस सिंह राजपुतले गरेका थिए। उनले नेपाल रेडक्रस समुदायको स्वास्थ्य र कल्याणका लागि सधैं प्रतिबद्ध रहेको र यस्ता स्वास्थ्य शिविरहरूले प्रारम्भिक स्वास्थ्य परीक्षण र जनचेतनामा ठूलो भूमिका खेल्ने बताए।
कार्यक्रममा प्रमुख अतिथि बिरगंज महानगरपालिका वडा नं–९ का अध्यक्ष जवाहर प्रसाद गुप्ता रहेका थिए । विशिष्ट अतिथिमा डा. श्याम बाबू पटेल, दिनानाथ रौनियार, डा. प्रयांश तिमलसेना, डा. पृथ्वी चौरसिया, डा. प्रशान्त साह, डा. मौशम गुप्ता र डा. निशा सिंहलगायतको सहभागिता रहेको थियो।
यस कार्यक्रमलाई सफल बनाउन बिरगंज न्यूरो एण्ड जनरल हस्पिटल रिसर्च सेन्टर त्रिमूर्ति चौक, बिरगंज महानगरपालिका वडा नं–९ कार्यालय, यशोदा ज्वेलर्स घण्टाघर, न्यू भवानी अफसेट प्रेस रानीघाट र दुर्गा पूजा सेवा समिति, रानीघाटले सहयोग गरेका थिए। कार्यक्रमको सञ्चालन कपडा बैंकका अध्यक्ष लालबाबू सिंहले गरेका थिए।
