वीरगंज । पर्सा निर्वाचन क्षेत्र नम्बर २ अन्तर्गत बहुदरमाई नगरपालिका–२ स्थित बैरिया बिर्तामा राष्ट्रिय स्वतन्त्र पार्टी (रास्वपा) का प्रतिनिधिसभा सदस्य पदका उम्मेदवार सुशील कुमार कानुले बिहीबार बिहान स्थानीय जनता, समाजसेवी, भद्रभलाद्मी तथा बुद्धिजीवीहरूसँग प्रत्यक्ष भेटघाट तथा छलफल गरेका छन्।

घरदैलो तथा अन्तरक्रिया कार्यक्रममा उम्मेदवार कानुले आगामी प्रतिनिधिसभा सदस्य निर्वाचनमा रास्वपाको चुनाव चिन्ह ‘घण्टी’ छापमा मतदान गर्न स्थानीयवासीहरूलाई आग्रह गरे।

उनले विगत करिब तीन दशकदेखि व्यक्ति–केन्द्रित राजनीतिका कारण देश पछाडि परेको उल्लेख गर्दै अब त्यस प्रवृत्तिको अन्त्य गरी जनताको प्रत्यक्ष सहभागितामूलक शासन व्यवस्था स्थापित गर्न परिवर्तन अपरिहार्य भइसकेको बताए।

कानुले देशको वर्तमान राजनीतिक, आर्थिक तथा सामाजिक अवस्थालाई सुधार गर्दै नयाँ नेपालको बलियो आधार निर्माण गर्न राष्ट्रिय स्वतन्त्र पार्टीले प्रस्तुत गरेको स्पष्ट र व्यावहारिक रोडम्याप नै उपयुक्त विकल्प भएको दाबी गरे। पुराना दल र नेताहरूका खोक्रा आश्वासनका कारण जनतामा निराशा बढेको उल्लेख गर्दै उनले परिणाममुखी र जवाफदेही राजनीतिको खाँचो औँल्याए।

छलफलका क्रममा स्थानीयवासीहरूले पनि वर्तमान राजनीतिक अवस्थाप्रति असन्तुष्टि व्यक्त गर्दै पुरानै अनुहार र दोहोरिएका वाचा–प्रतिवाचाबाट आजित भएको बताए। उनीहरूले देशमा वास्तविक परिवर्तनका लागि नयाँ सोच र नयाँ नेतृत्व आवश्यक रहेको धारणा राखे।

विशेषगरी युवाहरू तथा जेन–जी पुस्ताले आफ्ना अपेक्षाअनुसार काम गर्न सक्ने राजनीतिक शक्तिको खोजी गरिरहेको उल्लेख गर्दै उम्मेदवार कानुले रास्वपाप्रति विश्वास र समर्थन बढ्दै गएको बताए। स्थानीय युवाहरूले राष्ट्रिय स्वतन्त्र पार्टीलाई मतदान गर्ने प्रतिबद्धता जनाउनु उत्साहजनक रहेको उनको प्रतिक्रिया थियो।

घरदैलो तथा प्रत्यक्ष संवादमार्फत जनताको आवाज सुन्ने र उनीहरूको समस्या राष्ट्रिय संसद्सम्म पुर्‍याउने प्रतिबद्धता व्यक्त गर्दै कानुले आगामी दिनमा चुनावी अभियानलाई अझ तीव्र बनाइने जानकारी दिए।

वीरगंज । पर्सा निर्वाचन क्षेत्र नम्बर ४ अन्तर्गत आयोजित पार्टी प्रवेश कार्यक्रममा जनमत पार्टीका जगरनाथपुर गाउँपालिकाका अध्यक्ष बृजेश चौधरी राष्ट्रिय स्वतन्त्र पार्टी (रास्वपा) मा प्रवेश गरेका छन्। चौधरीसँगै दर्जनाैं जनमत पार्टीका नेता तथा कार्यकर्ताहरूले पार्टी परित्याग गर्दै रास्वपा रोजेका छन्।

कार्यक्रममा नवप्रवेशीहरूलाई रास्वपाका क्षेत्रीय सभापति जितेन्द्र मिश्र र पर्सा–४ का प्रतिनिधिसभा सदस्य उम्मेदवार टेकबहादुर शाक्यले खादा र फूलमाला लगाएर औपचारिक रूपमा स्वागत गरे।

पार्टी प्रवेश कार्यक्रममा बोल्दै बृजेश चौधरीले रास्वपामार्फत मात्र वास्तविक परिवर्तन सम्भव हुने धारणा व्यक्त गरे। उनले जनमत पार्टीले मधेसी समुदायलाई निरन्तर ठगेको र मधेसी भोटलाई सत्ता पुग्ने भर्‍याङका रूपमा प्रयोग गरेको आरोप लगाए।

चौधरीले भने, “हामीले विश्वास र समर्थन दिएको दलले जनताको अपेक्षा पूरा गर्न सकेन। अब परिवर्तनको मार्ग रास्वपाबाटै सम्भव छ।”

रास्वपाका उम्मेदवार टेकबहादुर शाक्यले पार्टी प्रवेशलाई जनआकाङ्क्षाको प्रतिबिम्बको रूपमा व्याख्या गर्दै भने, “आजको सहभागिता जनताले वैकल्पिक र जिम्मेवार राजनीति खोजिरहेको स्पष्ट सङ्केत हो। रास्वपा विकास, सुशासन र पारदर्शितालाई केन्द्रमा राखेर अघि बढेको छ। हामी पर्सा–४ को समग्र विकास, रोजगारी सिर्जना, शिक्षा र स्वास्थ्य क्षेत्रमा गुणात्मक सुधारका लागि प्रतिबद्ध छौँ।”

त्यसैगरी, क्षेत्रीय सभापति जितेन्द्र मिश्रले पार्टीको संगठन विस्तार र जनआधार मजबुत हुँदै गएको उल्लेख गर्दै नवप्रवेशीहरूलाई पार्टीको नीति र सिद्धान्तअनुसार सक्रिय भूमिका निर्वाह गर्न आग्रह गरे।

कार्यक्रममा स्थानीय नेता, कार्यकर्ता र सर्वसाधारणको उल्लेख्य उपस्थिति रहेको थियो। सहभागीहरूले रास्वपाको नीति, नेतृत्व र आगामी कार्ययोजनाप्रति विश्वास व्यक्त गर्दै आगामी निर्वाचनमा पार्टीलाई जिताउन सक्रिय भूमिका खेल्ने प्रतिबद्धता जनाएका थिए।