वीरगंज । पर्सा क्षेत्र नं. ४ का नेपाली कांग्रेसका उम्मेदवार रमेश रिजालले जिराभवानी गाउँपालिकाअन्तर्गतका सबै वडा तथा टोलका अगुवा कार्यकर्ताहरूसँग भेटघाट तथा छलफल गर्नुभएको छ।
पूर्व मन्त्री तथा निर्वतमान प्रतिनिधिसभा सदस्यसमेत रहनुभएका कांग्रेस उम्मेदवार रिजालले आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै गाउँपालिकाका वडा नं. १ देखि ५ सम्मका अगुवा कार्यकर्तासँग प्रत्यक्ष संवाद गर्नुभएको हो।
भेटघाटका क्रममा उम्मेदवार रिजालले निर्वाचन रणनीति, संगठन सुदृढीकरण र क्षेत्रको समग्र विकासका विषयमा छलफल गर्दै कांग्रेसलाई जिताउने अभियानमा एकताबद्ध भएर लाग्न कार्यकर्तालाई आग्रह गर्नुभयो। साथै उहाँले विगतमा गरेका काम र भावी योजनाबारे समेत जानकारी गराउनुभयो।
कार्यक्रममा नेपाली कांग्रेस मधेश प्रदेशका महामन्त्री बृहस्पती कृष्ण श्रेष्ठ, पर्सा जिल्ला प्रवक्ता रमेश पाण्डे, जिल्ला सह–सचिव नविन सिंह, क्षेत्रीय सभापति श्रीकान्त प्रसाद यादवलगायत पार्टीका नेता तथा कार्यकर्ताको उल्लेख्य उपस्थिति रहेको थियो।
