वीरगंज । वीरगंजबाट प्रकाशित कालिका टाईम्स दैनिक पत्रिकाले आफ्नाे छैटौँ वार्षिकोत्सव मानव सेवा आश्रम, वीरगंजमा मनाएको छ । कालिका टाईम्स प्रालिद्वारा प्रकाशित दैनिक पत्रिकाले पाँच वर्ष पूरा गरी छैटौँ वर्षमा प्रवेश गरेको अवसरमा आश्रममा आश्रितहरूलाई खाजा खुवाउँदै सामाजिक उत्तरदायित्वसहित वार्षिकोत्सव मनाइएको हो ।

डिजिटल युगमा पत्रकारिताको प्रतिस्पर्धा तीव्र बन्दै गएको वर्तमान सन्दर्भमा सत्य, तथ्य र विश्वसनीय समाचार पाठकसमक्ष पुर्‍याउनु नै कालिका टाईम्सको प्राथमिकता रहेको प्रबन्ध निर्देशक छठु साहले बताए । उनले भने, “यस यात्रामा कतै कमजोरी भएका हुन सक्छन्, तर ती कमजोरी स्वीकार गर्दै सुधार गर्ने प्रतिबद्धतासहित समाजलाई सकारात्मक दिशातर्फ लैजाने हाम्रो प्रयास निरन्तर जारी छ।”

दैनिक पत्रिका सञ्चालनका क्रममा देखिएका चुनौतीलाई सामना गर्दै खोजमूलक, निष्पक्ष र जनमुखी पत्रकारितालाई मूल आधार बनाएर अघि बढिरहेको कालिका टाईम्सका सम्पादक शम्भु कुमार सुमनले बताए ।

उनले भने, “हामीले सदरमुकाम मात्र होइन, जिल्लाका ग्रामीण भेगमा दबाइएका आवाज, ओझेलमा परेका मुद्दा र आम जनताको पीडालाई उजागर गर्दै आएका छौँ। पर्सासहित आसपासका जिल्लाका साना–ठूला विषयलाई समान महत्व दिँदै जनताको सरोकारका मुद्दा उठान गर्नु हाम्रो मूल धर्म हो।”

संघीयता स्थापनापछि तीन तहको सरकार बने पनि तराई–मधेशका धेरै नागरिक आज पनि शोषण, गरिबी, बेरोजगारी र पछौटेपनको सिकार रहेको यथार्थलाई कालिका टाईम्सले निरन्तर उजागर गर्दै आएको उनकाे भनाइ थियो । गणतन्त्र स्थापनापछि पनि गरिब, विपन्न तथा दलित समुदायको जीवनस्तरमा अपेक्षित परिवर्तन आउन नसकेको अवस्थालाई समाचारमार्फत् उठान गर्दै आएको दाबी समेत सुमनले गरे ।

कालिका टाईम्सका प्रबन्ध निर्देशक छठु साहको अध्यक्षतामा सम्पन्न कार्यक्रममा पत्रकार मनोज पटेल, सन्तोष साह, विनोद पटेल, हरिशंकर शर्मा, ताजिन्द्र साह, दिपेन्द्र यादव, जयप्रकाश कुशवाहा, राधेश्याम पटेल, श्रवण साह, अमोद शर्मा लगायतको उपस्थिति रहेको थियो ।

वीरगंज । मधेश साहित्य महोत्सवको दोस्रो संस्करण बिहीबारदेखि वीरगंजमा औपचारिक रूपमा सुरु भएको छ। वीरगंजस्थित मधेश विश्वविद्यालय परिसरमा सुरु भएको तीनदिने महोत्सवको उद्घाटन मधेश प्रदेश सरकारका वन तथा वातावरण मन्त्री शंकर चौधरीले गर्नुभएको हो।

उद्घाटन समारोहलाई सम्बोधन गर्दै प्रमुख अतिथि मन्त्री चौधरीले मधेशको भाषा, साहित्य र संस्कृतिले यहाँको पहिचान र इतिहासलाई जीवन्त बनाएको उल्लेख गर्नुभयो। उहाँले यस्ता महोत्सवले दबिएका आवाजलाई सार्वजनिक मञ्च प्रदान गर्दै सामाजिक एकता र सहअस्तित्वको भावना मजबुत बनाउने विश्वास व्यक्त गर्नुभयो।

वीरगंज महानगरपालिकाका प्रमुख तथा मधेश साहित्य महोत्सवका संरक्षक राजेशमान सिंहले मधेश साहित्य महोत्सव अब केवल कार्यक्रम मात्र नभई साझा सांस्कृतिक आन्दोलनका रूपमा स्थापित हुँदै गएको बताउनुभयो। उहाँले वीरगंजलाई साहित्य, कला र बौद्धिक संवादको केन्द्रका रूपमा विकास गर्न महानगरपालिका सधैं साथ रहने प्रतिबद्धता जनाउनुभयो।

मेयर सिंहले मधेशका विविध भाषा, समुदाय र पुस्तालाई जोड्ने यस्तो मञ्चले पहिचान, समावेशिता र आपसी सम्मानको संस्कार विकास गर्ने भन्दै महोत्सवले मधेशको कथालाई राष्ट्रिय तथा अन्तर्राष्ट्रिय स्तरसम्म पुर्‍याउने अपेक्षा व्यक्त गर्नुभयो।

मधेश र समग्र नेपालको विविध भाषा, साहित्य र संस्कृतिलाई एउटै मञ्चमा जोड्ने उद्देश्यसहित महोत्सव आयोजना गरिएको आयोजक संस्था उत्कर्ष नेपालका अध्यक्ष रितु राज पटेलले जानकारी दिनुभयो।

उत्कर्ष नेपालद्वारा आयोजित महोत्सव माघ १५, १६ र १७ गतेसम्म सञ्चालन हुनेछ। यस अवधिमा गाउँ केन्द्रित बहस, साहित्यिक सत्र, काव्यशाला, बहुभाषिक कवि गोष्ठी तथा विविध सांस्कृतिक प्रस्तुति समावेश गरिएको आयोजक संस्थाका जय साहले जानकारी दिनुभयो।

महोत्सवको पहिलो दिन ‘बीज पतन– गाउँः स्मृति, मिथक र यथार्थ’, ‘गाउँका युवाः पलायन, नीति र विकल्प’, ‘गाउँः लोकतन्त्र र सत्ता’, ‘गाउँः स्मृति र इतिहास’ लगायत सत्र तथा ‘नृत्य नवरंग’ सम्पन्न भएका छन्।

शुक्रबार हुने दोस्रो दिन शिक्षा, स्वास्थ्य र समानता, गाउँः संघर्ष र संरचना, गाउँः विकास बनाम विनाश, गाउँका खबर–खबरका गाउँ, ‘गाउँ काल्ह आ आज’ सत्रसहित वक्ता तथा कवि गोष्ठी, नेटुवा नाच, गीत तथा नाटक प्रस्तुति हुनेछन्।

महोत्सवको अन्तिम दिन काव्यशाला, ‘गाउँ बन्दै शहर–शहर बन्दै गाउँ’ तथा भोजपुरी साहित्यमा गाउँ विषयक सत्र सञ्चालन हुनेछन्। समापन समारोहका प्रमुख अतिथि मधेश प्रदेश प्रमुख सुरेन्द्र लाभ कर्ण रहनेछन्। साथै शनिबार पुरानो बस पार्क (दियालो होटल अगाडि) आदर्शनगरमा विशेष सांगीतिक साँझ आयोजना गरिनेछ, जसमा भारतकी प्रसिद्ध लोक गायिका कल्पना पटवारीलगायत स्थानीय कलाकारहरूले प्रस्तुति दिनेछन्।