वीरगंज । पर्सा क्षेत्र नम्बर १ मा नेकपा एमालेका उम्मेदवार प्रदीप यादवले पार्टीका नेता र कार्यकर्ताहरु एकजुट भएर लागेका देख्दा आफूमा नयाँ उर्जा थपिएको बताएका छन्। बुधबार वीरगन्जमा आयोजित एमाले वीरगन्ज महानगर कमिटीको चौंथो पूर्ण बैठकमा उनले पार्टीका युवा कार्यकर्ताहरुको उत्साहले पर्सामा एमालेको जित सुनिश्चित हुँदै गएको बताए।
पूर्वमन्त्री यादवले भने, “पार्टीलाई जिताउने आधार भनेकै नेता र कार्यकर्ताको मेहनत र सक्रियता हो। यसपालि पर्सामा एमालेका नेता र कार्यकर्ताहरु एकजुट भएको देख्दा उम्मेदवारको मनोबल पनि बढेको छ र हामीमा ऊर्जा थपिएको छ।”
बैठक एमाले वीरगन्ज महानगर कमिटीका कार्यबाहक अध्यक्ष लियाकत अलि अध्यक्षतामा तथा केन्द्रीय सदस्य विजय कुमार सरावगीको प्रमुख आतिथ्यतामा सम्पन्न भएको थियो। बैठकमा वीरगन्ज महानगर इन्चार्ज विचारी यादवको पनि उपस्थिती रहेको थियो। बैठकले आगामी निर्वाचन प्रभावकारी बनाउन ५५१ सदस्यीय वीरगन्ज महानगर निर्वाचन परिचालन कमिटी गठन गर्ने निर्णय पनि गरेको छ।
नेताहरूले बैठकमा समसामयिक राजनीतिक अवस्था, संगठन विस्तार र जनआधार मजबुत बनाउने विषयमा आफ्ना धारणा राखे। आगामी निर्वाचनमा पार्टीलाई विजयी बनाउन सबै तहका कार्यकर्ताले एकताबद्ध भएर सक्रिय भूमिका निर्वाह गर्नुपर्नेमा जोड दिएका थिए।
बैठकमा पर्सा निर्वाचन क्षेत्र नम्बर २ का उम्मेदवार रिमा यादव, क्षेत्र नम्बर ३ का उम्मेदवार रुपेश पाण्डेलगायत पार्टीका केन्द्रीय, जिल्ला तथा महानगर तहका नेता–कार्यकर्ताहरूको उपस्थिति रहेको थियो।
