वीरगंज । अपाङ्गता भएका व्यक्तिले पनि खेल्न र मनोरञ्जन गर्न पाउनुपर्छ भन्ने उद्देश्यका साथ नेपाल नेत्रहीन क्रिकेट संघले वीरगञ्जमा क्रिकेट गतिविधि सञ्चालन गरेको छ ।
नेपाल नेत्रहीन क्रिकेट संघअन्तर्गत सञ्चालन भइरहेको परियोजनामार्फत वीरगञ्ज महानगरपालिका वडा नम्बर ४ स्थित त्रिजुद्ध महाविर प्रसाद रघुविर राम माध्यमिक विद्यालयमा १५ सदस्यीय क्लब गठन गरिएको हो । क्लब शिववरण चौधरीको अध्यक्षतामा गठन गरिएको छ । क्लबको उपाध्यक्षमा प्रतिमा साह, सचिवमा नन्दनी कुमारी र कोषाध्यक्षमा मनिषा कुमारी रहेका छन् ।
क्लबमा १० जना नेत्रहीन र ५ जना दृष्टियुक्त विद्यार्थी समावेश गरिएको छ । नेत्रहीन र दृष्टियुक्त विद्यार्थी सँगसँगै खेल्ने वातावरण निर्माण गर्ने उद्देश्यले मिश्रित क्लब गठन गरिएको नेपाल नेत्रहीन क्रिकेट संघकी परियोजना अधिकृत भावना केसीले बताइन् । उनका अनुसार क्लब गठनसँगै अब नेत्रहीन खेलाडीले अभ्यास गर्न मिल्ने पिच निर्माणको काम अघि बढाइएको छ ।
कार्यक्रममा वीरगञ्ज महानगरपालिका वडा नम्बर ४ का वडा अध्यक्ष जगत साह कानुले क्रिकेटको प्रवद्र्धन र व्यवस्थापनका लागि विद्यालय तहबाटै गतिविधि सञ्चालन गर्न आवश्यक रहेको बताए । उनले यस्ता कार्यक्रमले अपाङ्गता भएका विद्यार्थीको आत्मविश्वास बढाउने र समाजमा सकारात्मक सन्देश जाने उल्लेख गरे ।
नेपाल नेत्रहीन क्रिकेट संघ मधेश प्रदेशका अध्यक्ष महेश साहले अपाङ्गता भएका व्यक्ति अरूले खेलेको हेर्ने वा ताली बजाउनेमा मात्र सीमित हुनु नहुने धारणा राखे । अपाङ्गता भएका व्यक्तिले पनि खेल खेल्न पाउनुपर्छ भन्ने सोचअनुसार संघले निरन्तर यस्ता गतिविधि सञ्चालन गर्दै आएको उनले बताए ।
कार्यक्रमकै अवसरमा क्लबका पदाधिकारी तथा सदस्यलाई आत्मरक्षा (सेफ डिफेन्स) सम्बन्धी प्रशिक्षण पनि दिइएको छ। राष्ट्रिय जुडो खेलाडी रञ्जना खड्का र प्रिति तामाङले प्रशिक्षण दिएका हुन् । आवश्यकता पर्दा आफ्नो सुरक्षाका लागि नेत्रहीन विद्यार्थीलाई यस्तो तालिम उपयोगी हुने परियोजना अधिकृत केसीले बताइन् ।
उनका अनुसार आगामी दिनमा क्लबका सदस्यलाई यौन तथा प्रजनन स्वास्थ्य सम्बन्धी सचेतनामूलक तालिम र पाँच दिने आधारभूत क्रिकेट प्रशिक्षण पनि प्रदान गरिनेछ । संविधानले व्यवस्था गरेको खेल्न र मनोरञ्जन गर्न पाउने अधिकारको व्यावहारिक कार्यान्वयनका लागि संस्थाले विद्यालयस्तरमै वातावरण निर्माण गरिरहेको केसीको भनाइ छ ।
