सेढवा । पर्साको जिराभवानी गाउँपालिका–२ सेढवामा नेपाली कांग्रेसको वडा पार्टी कार्यालयको उद्घाटन आज एक कार्यक्रमबीच सम्पन्न भएको छ। पार्टी कार्यालयको उद्घाटन नेपाली कांग्रेस पर्सा क्षेत्र नं. ४ का उम्मेदवार रमेश रिजालले गर्नुभएको हो।
नेपाली कांग्रेस वडा इकाइ अध्यक्ष सरोज चौरसियाको सभापतित्वमा सम्पन्न कार्यक्रममा मधेस प्रदेशका वन तथा वातावरण मन्त्री शंकर प्रसाद चौधरी, पूर्व मन्त्री जनार्दन सिंह क्षेत्री, नेपाली कांग्रेसका प्रवक्ता रमेश पाण्डे, जिराभवानी गाउँपालिकाका अध्यक्ष अनोज चौधरी, उपाध्यक्ष रेखा चौधरी, पटेर्वासुगौली गाउँपालिकाका अध्यक्ष दिनेश चौधरी, जगरनाथपुर गाउँपालिकाका अध्यक्ष श्रीकान्त यादव, पूर्व वडा अध्यक्ष शेख नुमान आजम, वडा नं. ५ का वडा अध्यक्ष दारा सिंह, गाउँपालिका कार्यसमितिका कोषाध्यक्ष सोमनाथ सापकोटा, पालिका सदस्य ऋषि हजरालगायतको उपस्थिति रहेको थियो।
कार्यक्रमलाई सम्बोधन गर्दै प्रमुख अतिथि रमेश रिजालले नेपाली कांग्रेसको पहलमा हुलाकी राजमार्ग, जनता सडक तथा जगरनाथपुर–सुपौली–परासवा हुँदै लाटो माइँदेखि संकर सरैयासम्मको कच्ची सडक कालोपत्रे गरिएको उल्लेख गर्नुभयो। उहाँले विकास र समृद्धिका लागि कांग्रेसको योगदान निरन्तर रहेको बताउनुभयो।
त्यसैगरी, मधेस प्रदेशका वन तथा वातावरण मन्त्री शंकर प्रसाद चौधरीले आगामी फागुन २१ गते हुने प्रतिनिधिसभा निर्वाचनमा नेपाली कांग्रेसका उम्मेदवार रमेश रिजाल अन्य उम्मेदवारको तुलनामा स्वच्छ, अनुभवी र सक्षम रहेको दाबी गर्नुभयो। उहाँले निर्वाचनमा एकजुट भएर कांग्रेस उम्मेदवारलाई मतदान गर्न आग्रह गर्दै पार्टी संगठन सुदृढीकरण गरी जनताको पक्षमा काम गर्नुपर्नेमा जोड दिनुभयो।
