वीरगंज । पर्सा क्षेत्र नम्बर २ का राष्ट्रिय स्वतन्त्र पार्टी (रास्वपा) का उम्मेदवार सुशील कुमार कानुले शहिद दिवसको अवसरमा मधेस आन्दोलनका शहिदहरूको सालिकमा श्रद्धाञ्जली अर्पण गर्नुभएको छ ।
शुक्रबार शहिद दिवसको अवसरमा वीरगंजको घण्टाघरस्थित मधेसी शहिद स्मारक पार्क पुगेर उम्मेदवार कानुले मधेस आन्दोलनका शहिद धर्मराज सिंह, दिलिप चौरसिया, सोहन साह कलवार, भोलाप्रसाद तेली, दिनानाथ साह गोढ, शत्रुधन पटेल र आशीष रामको सालिकमा पुष्पगुच्छा अर्पण गर्दै श्रद्धाञ्जली दिनुभएको हो ।
सो अवसरमा उम्मेदवार कानुले शहिद दिवसका दिनसमेत मधेस केन्द्रित दलहरूको पर्याप्त चासोमा नपरेका मधेस आन्दोलनका शहिदहरूको बलिदान आफ्नाे दिल र दिमागमा सधैं ताजा रहेकाले शहिद स्मारकमा पुगेर श्रद्धाञ्जली अर्पण गरेको बताउनुभयो ।
विगतमा भएका हरेक मधेस आन्दोलनमा आफू सक्रिय रूपमा सहभागी भएको स्मरण गर्दै उहाँले भन्नुभयो, “मधेस आन्दोलनका यिनै शहिदहरूको कारण आज मधेस र मधेसीले अपमान र विभेदको सट्टा पहिचान र सम्मान पाएका छन् । यी शहिदहरूलाई म कहिल्यै बिर्सन सक्दिनँ । शहिदहरूले देखाएको बाटोमा सधैं हिँड्ने प्रयास गर्नेछु ।”
उम्मेदवार कानुले मुलुकमा भएका हरेक राजनीतिक परिवर्तनका आन्दोलन र विद्रोहमा ज्यानको आहूति दिएका सम्पूर्ण शहिदहरूप्रति पनि श्रद्धाञ्जली व्यक्त गर्नुभएको छ ।
