सेढवा । थारु लेखक संघ नेपालको आयोजनामा तथा थारु अतिथि सेवा सदन समितिको सहआयोजनामा दशौँ राष्ट्रिय थारु साहित्य सम्मेलन आजदेखि सुरु भएको छ। पटेर्वासुगौली गाउँपालिका–२, बेलवास्थित थारु अतिथि सेवा सदनको सभा हलमा सम्मेलनको औपचारिक उद्घाटन गरिएको हो।
सम्मेलन सदन समितिका अध्यक्ष रामचन्द्र दहित थारुको सभापतित्वमा सम्पन्न उद्घाटन कार्यक्रममा नेपाल प्रज्ञा प्रतिष्ठानका उपकुलपति बिमल कृष्ण श्रेष्ठ प्रमुख अतिथिका रूपमा उपस्थित रहनु भएको थियो।
कार्यक्रममा मधेश सरकारका वन तथा वातावरण मन्त्री शंकर प्रसाद चौधरी, नेपाली कांग्रेसका नेता सुरेन्द्र चौधरी र मोहनलाल चौधरी, जनता समाजवादी पार्टीका नेता डा. कृपासिन्धु चौधरी, नेपाल कम्युनिस्ट पार्टीका नेता जयप्रकाश थारु तथा नेता नागेन्द्र चौधरीलगायतले विशिष्ट अतिथिका रूपमा सहभागिता जनाउँदै शुभकामना मन्तव्य व्यक्त गरेका थिए।
सम्मेलनअन्तर्गत कविता वाचन, रचनापाठ, साहित्यिक विमर्श तथा स्रष्टा सम्मान कार्यक्रम समावेश गरिएको छ। आयोजकका अनुसार सम्मेलनले थारु साहित्य तथा संस्कृतिको संरक्षण र प्रवर्द्धन गर्दै स्थानीय साहित्यिक गतिविधिलाई राष्ट्रिय तहसम्म पुर्याउने र नयाँ पुस्तालाई साहित्य सिर्जनातर्फ आकर्षित गर्ने उद्देश्य लिएको छ।
