वीरगंज । नेकपा एमाले पर्सा क्षेत्र नम्बर–२ की प्रतिनिधिसभा सदस्य उम्मेदवार रिमा यादवले घरदैलो तथा मतदाता भेटघाट कार्यक्रमलाई निरन्तरता दिएकी छन्। युवा तथा जेनजी उमेर समूहकी उम्मेदवार यादवको घरदैलो कार्यक्रममा उल्लेखनीय जनसमर्थन र उत्साह देखिएको छ।

बुधबार पर्सागढी नगरपालिका वडा नम्बर–९ स्थित एकटांगा क्षेत्रमा सम्पन्न घरदैलो कार्यक्रमका क्रममा उम्मेदवार यादवले मतदातासँग प्रत्यक्ष संवाद गर्दै आगामी निर्वाचनमा सूर्य छापमा मतदान गर्न आग्रह गरिन् । स्थानीय मतदाताहरूले जेनजी आन्दोलनको मर्मअनुसार एमालेले शिक्षित, सक्षम र नयाँ पुस्ताको उम्मेदवार अघि सारेको भन्दै प्रशंसा गरेका थिए।

कार्यक्रमका क्रममा केही मतदाताहरूले अब पुराना नेताहरूलाई भोट नदिने घोषणा गर्दै नयाँ सोच र ऊर्जा बोकेकी जेनजी उम्मेदवार रिमा यादवलाई तन, मन र धनले सहयोग गर्ने प्रतिबद्धता व्यक्त गरे।

उम्मेदवार यादवले स्थानीय पूर्वाधार विकास, रोजगारी सिर्जना, स्वास्थ्य, शिक्षा र समाजकल्याणलाई आफ्नो प्राथमिकतामा राखेको बताउँदै यस क्षेत्रमा अझै धेरै विकासका काम बाँकी रहेको र ती काम पूरा गर्न आफू निर्वाचनमा होमिएको स्पष्ट पारिन्।

घरदैलो कार्यक्रममा पर्सागढी नगरपालिकाका मेयर गोकर्ण पाठक, एमाले नेतृ सिता लामा तथा सयौँ नेता–कार्यकर्ताहरूको सहभागिता रहेको थियो।

यसैबीच, यस क्षेत्रअन्तर्गत पर्ने बहुदरमाई नगरपालिकाका मेयर सिंगासन साह तेली सहित दुई जना वडाध्यक्ष मंगलबार नेकपा एमालेमा प्रवेश गरेपछि पर्सा क्षेत्र नम्बर–२ मा एमालेको संगठनात्मक शक्ति थप बलियो बनेको छ ।

वीरगंज । पर्सा क्षेत्र नम्बर–१ बाट जनमत पार्टीका प्रतिनिधिसभा सदस्य उम्मेदवार ओमप्रकाश सरार्फले हरघर रोजगारी सिर्जना र महिला उद्यमशीलतालाई आफ्नो प्रमुख प्राथमिकता बनाउने बताएका छन्।

उम्मेदवार सरार्फको वीरगंज महानगरपालिकाको वडा नम्बर–१५ लक्ष्मणवा तथा वडा नम्बर–८ पानी ट्यांकी क्षेत्रमा भेटघाट, संवाद तथा घरदैलो कार्यक्रम सम्पन्न भएको हो। कार्यक्रमका क्रममा उनले वीरगंज औद्योगिक नगरी भए पनि स्थानीय युवाहरू बेरोजगार रहनु र रोजगारीको खोजीमा विदेश वा अन्य ठाउँ जान बाध्य हुनु दुःखद अवस्था भएको बताए।

सरार्फले उक्त समस्याको समाधानका लागि आफूले स्पष्ट रोडम्याप तयार गरेको उल्लेख गर्दै बेरोजगार युवालाई रोजगारी वा सीप प्रदान गरी स्वरोजगारतर्फ उन्मुख गरिने प्रतिबद्धता जनाए। साथै महिलाहरूलाई पनि आयआर्जन र उद्यमशीलतासँग जोड्ने योजनामा जनमत पार्टी प्रतिबद्ध रहेको उनले बताए।

देश र मधेसको निकासका लागि उत्कृष्ट भिजन जनमत पार्टी र पार्टी अध्यक्ष डा. सीके राउतसँग मात्र रहेको दाबी गर्दै सरार्फले आगामी निर्वाचनमा हर्न छापमा मतदान गर्न मतदाताहरूसँग आग्रह गरे।

कार्यक्रममा जनमत पार्टीका नेताहरू विध्या गुप्ता, रम्भा मिश्रा, श्याम गुप्ता, राजनारायण मिश्रा, भूपेन्द्र साह, डा. मनोज कुमार, सीए देवराज, महादेव शर्मा, निराजन कुशवाहा, हिरालाल राम, डा. मोहम्मद राजा, रामजी रौनियार, सहनवाज राकी, अजित सिंह, मन्जय शर्मा, सुमित सिंह, अञ्जना गुप्ता, सत्युग साहलगायतको उल्लेखनीय सहभागिता रहेको थियो।

वीरगंज । पर्सा क्षेत्र नम्बर–१ अन्तर्गत वीरगंज वडा नम्बर–१८ इनर्वामा मधेस आन्दोलनका वीर सहिद धर्मराज सिंहकी आमासँग जनमत पार्टीका प्रतिनिधिसभा उम्मेदवार ओमप्रकाश सर्राफको भेट भावुक क्षणमा परिणत भएको छ।

सहिद धर्मराज सिंहको तस्बिरअघि शिर निहुराउँदै सर्राफले मधेस आन्दोलनका सम्पूर्ण सहिदहरूको सपना साकार पार्न जीवनभर संघर्ष गर्ने कठोर संकल्प व्यक्त गरे। सहिदको आमाबाट प्राप्त आँसु, पीडा र आशीर्वादलाई उच्च सम्मानका साथ स्वीकार गर्दै उनले सहिदको बलिदानी कहिल्यै बिर्सन नदिने प्रतिबद्धता जनाए।

आशीर्वाद ग्रहणपछि सर्राफले भने, “सहिदको रगतले लेखिएको इतिहास मेट्न दिइने छैन। अधिकार, पहिचान र सम्मानका लागि सहिदले देखेका सपना पूरा नभएसम्म मेरो संघर्ष रोकिने छैन।”

उनले मधेस आन्दोलन कुनै विगतको सम्झनामा सीमित नभई आज पनि जिउँदो र सान्दर्भिक मुद्दा भएको उल्लेख गर्दै सहिदको बलिदानीबाट प्राप्त उपलब्धि जोगाउन तथा आन्दोलनका एजेन्डा बचाउन आफू उम्मेदवार बनेको स्पष्ट पारे।

सर्राफले सहिदको बलिदानीलाई सत्ता र स्वार्थ केन्द्रित राजनीतिले ओझेल पार्न खोजिएको आरोप लगाउँदै त्यसविरुद्ध जनताको बलमा लड्ने अठोट दोहोर्‍याए। सहिद परिवारको पीडालाई राज्यले बेवास्ता गर्नु गम्भीर अपराध भएको टिप्पणी गर्दै उनले भने, “सहिदको सम्मान भाषणमा होइन, अधिकारको कार्यान्वयनमा देखिनुपर्छ।”

सहिदकी आमाबाट प्राप्त आशीर्वादलाई आफ्नो संघर्षको शक्ति ठान्दै सर्राफले मधेस आन्दोलनका सहिदप्रति सधैं निष्ठावान् रहने प्रतिबद्धता व्यक्त गरे।

वीरगंज । पर्सा क्षेत्र नं. २ का प्रतिनिधिसभा सदस्य उम्मेदवार अशोक टेमानीको घरदैलो अभियान पर्सागढी नगरपालिकाको वडा नं. ३ अन्तर्गत झुलीटार, विरुवागुठी, भाबराहलगायतका टोलहरूमा उत्साहपूर्वक सम्पन्न भएको छ। जनता समाजवादी पार्टी (जसपा)बाट उम्मेदवार टेमानीले घरदैलो अभियानलाई तीव्र बनाएसँगै पर्सा क्षेत्र नं. २ मा जसपाको प्रभाव झनै मजबुत बन्दै गएको देखिएको छ।

घरदैलो अभियानमा स्थानीय युवा, महिला तथा वृद्धवृद्धाको उल्लेखनीय सहभागिता रहेको थियो। यस क्रममा उम्मेदवार टेमानीले मतदातासँग प्रत्यक्ष संवाद गर्दै उनीहरूको समस्या, पीडा र अपेक्षाबारे जानकारी लिएका थिए। संवादका क्रममा स्थानीय महिला मतदाताहरूले विगतमा निर्वाचित नेताहरूबाट पटक–पटक धोका पाएको गुनासो व्यक्त गर्दै चुनावका बेला मात्र देखिने र जितेपछि बेपत्ता हुने प्रवृत्तिले क्षेत्रका समस्या कहिल्यै समाधान हुन नसकेको बताएका थिए।

स्थानीय युवाहरूले पनि ठूलो–ठूलो नारा बोकेर भोट माग्ने तर राजनीतिलाई व्यापार बनाउने पुराना अनुहारहरूप्रति आक्रोश व्यक्त गरे। उनीहरूले यस्ता उम्मेदवारलाई यसपटक मतपत्रमार्फत जवाफ दिने चेतावनी दिँदै पर्सा क्षेत्र नं. २ का जनताहरू अब सचेत भइसकेको बताए। पुराना उम्मेदवारहरू अहिले पनि उम्मेदवारी दिएर जनतामाझ नआएको उल्लेख गर्दै उनीहरूले विकल्पका रूपमा जसपा उम्मेदवार अशोक टेमानी नै उपयुक्त रहेको धारणा राखे।

शिक्षामा अब्बल तथा सफल उद्योगीका रूपमा परिचित टेमानीले जनताको वास्तविक समस्या समाधान गर्ने उद्देश्यले चुनावी मैदानमा उत्रिएको भन्दै स्थानीय मतदाताहरूले उनलाई पूर्ण समर्थन जनाउने प्रतिबद्धता व्यक्त गरेका छन्।

घरदैलो अभियानकै क्रममा मतदाताका गुनासालाई सम्बोधन गर्दै उम्मेदवार टेमानीले जनताको समस्या, किसानका पीडा र क्षेत्रका आवश्यकतालाई गहिरोसँग बुझेर समाधान खोज्न आफू उम्मेदवार बनेको बताए। उनले लहलहीमा नपरी सक्षम, इमानदार र जनताप्रति उत्तरदायी व्यक्तिलाई मत दिन आग्रह गरे।

उनले भने, “तपाईंहरू एउटै पार्टीलाई जिताएर पाँच वर्षसम्म हेर्नुहोस्, काम भएन भने ढुंगा हान्नुस्। राम्रो मान्छे छानेर आफ्नो अमूल्य मत प्रयोग गर्नुहोस्।” मतदाताको एउटै भोटले ठूलो परिवर्तन ल्याउन सक्ने उल्लेख गर्दै उनले उम्मेदवारको क्षमता, पृष्ठभूमि र कार्यक्षमताको मूल्याङ्कन गरेर मात्र मत दिन आग्रह गरे।

घरदैलो अभियानमा जसपाका नेता–कार्यकर्ता, स्थानीय युवा, समाजसेवी तथा विभिन्न क्षेत्रका विशिष्ट व्यक्तित्वहरूको उल्लेखनीय सहभागिता रहेको थियो।