वीरगंज । जेनजी प्रदर्शनको क्रममा नेपाली कांग्रेसका केन्द्रीय सदस्य एवं उद्योगी अनिल रुङ्टाको वीरगञ्जस्थित घरमा आगलागी हुँदा गम्भीर घाइते भएकी एक महिलाको उपचारको क्रममा मृत्यु भएको छ।

पर्सा प्रहरीले दिएको जानकारी अनुसार पर्साको सखुवा प्रसौनी गाउँपालिका–२ निवासी ४५ वर्षीया सुशीला हजाराको सोमबार काठमाडौंस्थित कीर्तिपुर बर्न अस्पतालमा उपचारको क्रममा मृत्यु भएको हो। उनी गत भदौ २४ गते प्रदर्शनकारीले रुङ्टाको घरमा आगो लगाउँदा ५० प्रतिशत शरीर जलेर गम्भीर घाइते भएकी थिइन्।

नेशनल मेडिकल कलेज वीरगञ्जमा प्रारम्भिक उपचारपछि स्वास्थ्य अवस्था सुधार नहुँदा उनलाई थप उपचारका लागि काठमाडौं पठाइएको थियो।

यसै घटनामा गम्भीर घाइते भएका भारत बिहार राज्य सुगौली निवासी १८ वर्षीय विनय यादवको ९० प्रतिशत शरीर जलेको छ। हाल कीर्तिपुर बर्न अस्पतालमा उपचाररत यादवको स्वास्थ्य अवस्था क्रमशः सुधारोन्मुख रहेको पर्साका प्रहरीका प्रवक्ता प्रहरी नायब उपरीक्षक किशोर लम्सालले बताए।

वीरगंज । दसैं, तिहार र छठ जस्ता ठूला चाडपर्व नजिकिँदै गर्दा यात्रुहरूको चाप असामान्य रूपमा बढ्ने भएकाले पर्सा प्रहरीले यात्रुहरूको सहज र सुरक्षित यात्रा सुनिश्चित गर्न विशेष पहल थालेको छ।

यसै सन्दर्भमा आजदेखि वीरगञ्जका पाँच प्रमुख स्थानहरूमा यात्रु सहायता कक्ष (हेल्प डेस्क) सञ्चालनमा आएको छ। जिल्ला प्रहरी कार्यालय पर्साका डिएसपी किशोर लम्साल र जिल्ला ट्राफिक प्रहरी कार्यालय पर्साका प्रमुख लोकराज भट्टको संयुक्त पहलमा यो सेवा सुरु गरिएको हो।

डिएसपी लम्सालका अनुसार यात्रु सहायता कक्षहरूले यात्रुलाई टिकट, गन्तव्य र यातायात सम्बन्धी जानकारी, हराइपत्ता, सवारी व्यवस्थापन तथा आपतकालीन सहयोग प्रदान गर्नेछन्।

स्थापना गरिएका सहायता कक्षहरू घन्टाघर, वीरगञ्ज भन्सार क्षेत्र (शंकराचार्य गेट), बसपार्क चौक, परवानीपुर चौक र अन्य रणनीतिक स्थानहरूमा छन्। यस पहलले यात्रुहरूको सुरक्षामा सुधार ल्याउने र दुर्घटना वा अन्य सम्भावित समस्या कम गर्ने अपेक्षा गरिएको छ।

ट्राफिक प्रहरी प्रमुख भट्टले भने, “चाडपर्वको समयमा यात्रुहरूको भीड अत्यधिक हुने भएकाले हामीले यो विशेष पहल गरेका हौं। यो सेवा निरन्तर सञ्चालन हुनेछ र यात्रुलाई सजिलो, सुरक्षित र सहज यात्रा सुनिश्चित गर्न सहयोग पुर्‍याउनेछ।”