वीरगंज । पर्सा क्षेत्र नं. २ का प्रतिनिधिसभा सदस्य उम्मेदवार तथा जनता समाजवादी पार्टी (जसपा) का नेता अशोक टेमानीको घरदैलो अभियान बुधबार पर्सागढी नगरपालिकाको वडा नं. ८ मा सम्पन्न भएको छ।
घरदैलो अभियानअन्तर्गत हरपुरस्थित अगुवा कार्यकर्ता भेला आयोजना गरिएको थियो । भेलामा सहभागी स्थानीय अगुवा कार्यकर्ताहरूले क्षेत्रका विभिन्न समस्या उम्मेदवार टेमानीसमक्ष राख्दै यसपटक विकासप्रेमी, अनुभवी र शिक्षित उम्मेदवारलाई जिताउनुपर्ने धारणा व्यक्त गरे ।
कार्यकर्ताहरूले विगतमा चुनाव जितेर गएका नेताहरू जनताको समस्या बुझ्न नआएको गुनासो गर्दै कुनै पनि प्रलोभनमा नपरी जसपाका उम्मेदवार टेमानीलाई अत्याधिक मतले विजयी गराउन मतदातासँग आग्रह गरे । साथै, जसपाका अगुवाहरू अन्य पार्टी प्रवेश गरेको भन्ने हल्ला निराधार भएको भन्दै भ्रममा नपर्न मतदाताहरूलाई सचेत गराए ।
पर्सा क्षेत्र नं. २ अन्तर्गत पर्ने पर्सागढी नगरपालिकाका विभिन्न वडा र टोलमा जसपाको बलियो जनसमर्थन रहेको दाबी गर्दै आगामी फागुन २१ गते हुने निर्वाचनमा छाता छापमा मतदान गर्न आग्रह गरिएको थियो ।
भेलालाई सम्बोधन गर्दै उम्मेदवार अशोक टेमानीले आफू क्षेत्रका समस्या प्रति जानकार रहेको बताउँदै नीतिगत तहमा पुगेर जनताको समस्या समाधान गर्न निर्वाचनमा होमिएको स्पष्ट पारे । उनले विगतदेखि नै जनसेवामा सक्रिय रहेको उल्लेख गर्दै अब नीति निर्माणको तहबाट जनताको पक्षमा काम गर्ने प्रतिबद्धता व्यक्त गरे।
उम्मेदवार टेमानीले विकासका लागि इमानदार, अनुभवी र शिक्षित नेतृत्व आवश्यक रहेको भन्दै जसपाको छाता छापमा मतदान गर्न मतदाताहरूलाई आग्रह गरे।
