वीरगंज । पर्सा क्षेत्र नम्बर–१ अन्तर्गत वीरगंज वडा नम्बर–१८ इनर्वामा मधेस आन्दोलनका वीर सहिद धर्मराज सिंहकी आमासँग जनमत पार्टीका प्रतिनिधिसभा उम्मेदवार ओमप्रकाश सर्राफको भेट भावुक क्षणमा परिणत भएको छ।
सहिद धर्मराज सिंहको तस्बिरअघि शिर निहुराउँदै सर्राफले मधेस आन्दोलनका सम्पूर्ण सहिदहरूको सपना साकार पार्न जीवनभर संघर्ष गर्ने कठोर संकल्प व्यक्त गरे। सहिदको आमाबाट प्राप्त आँसु, पीडा र आशीर्वादलाई उच्च सम्मानका साथ स्वीकार गर्दै उनले सहिदको बलिदानी कहिल्यै बिर्सन नदिने प्रतिबद्धता जनाए।
आशीर्वाद ग्रहणपछि सर्राफले भने, “सहिदको रगतले लेखिएको इतिहास मेट्न दिइने छैन। अधिकार, पहिचान र सम्मानका लागि सहिदले देखेका सपना पूरा नभएसम्म मेरो संघर्ष रोकिने छैन।”
उनले मधेस आन्दोलन कुनै विगतको सम्झनामा सीमित नभई आज पनि जिउँदो र सान्दर्भिक मुद्दा भएको उल्लेख गर्दै सहिदको बलिदानीबाट प्राप्त उपलब्धि जोगाउन तथा आन्दोलनका एजेन्डा बचाउन आफू उम्मेदवार बनेको स्पष्ट पारे।
सर्राफले सहिदको बलिदानीलाई सत्ता र स्वार्थ केन्द्रित राजनीतिले ओझेल पार्न खोजिएको आरोप लगाउँदै त्यसविरुद्ध जनताको बलमा लड्ने अठोट दोहोर्याए। सहिद परिवारको पीडालाई राज्यले बेवास्ता गर्नु गम्भीर अपराध भएको टिप्पणी गर्दै उनले भने, “सहिदको सम्मान भाषणमा होइन, अधिकारको कार्यान्वयनमा देखिनुपर्छ।”
सहिदकी आमाबाट प्राप्त आशीर्वादलाई आफ्नो संघर्षको शक्ति ठान्दै सर्राफले मधेस आन्दोलनका सहिदप्रति सधैं निष्ठावान् रहने प्रतिबद्धता व्यक्त गरे।
