वीरगंज । राष्ट्रिय स्वतन्त्र पार्टी (रास्वपा) का तर्फबाट पर्सा क्षेत्र नं.–१ का प्रतिनिधिसभा सदस्य उम्मेदवार हरि पन्तलाई वीरगंज भन्सार एरियाका स्थानीय बासिन्दाहरूले स्वागत गरेका छन्।
रास्वपाद्वारा भन्सार एरियामा आयोजित घरदैलो कार्यक्रमका क्रममा स्थानीयहरूले उम्मेदवार पन्तलाई स्वागत गरेका हुन्। स्वागत कार्यक्रममा वीरगंज भन्सार एजेन्ट संघका पूर्व अध्यक्ष विजय साहले अब रास्वपाले मात्र देशमा आमूल परिवर्तन ल्याएर मुलुकलाई सुशासन र समृद्धिको यात्रातर्फ उन्मुख गराउन सक्ने विश्वास व्यक्त गर्दै आफूहरू निस्वार्थ रूपमा रास्वपालाई सहयोग गर्न प्रतिबद्ध रहेको बताए।
घरदैलो अघि आयोजित कोणसभालाई सम्बोधन गर्दै रास्वपा पर्सा सभापति एवं पर्सा क्षेत्र नं.–१ का उम्मेदवार हरि पन्तले पुराना दलका उम्मेदवारहरू मत माग्न आए उनीहरूलाई विगत ३५ वर्षमा के गरे र अब जितेपछि के गर्ने योजना छ भन्ने प्रश्न गर्न आम मतदाताहरूलाई आग्रह गरे। उनले फेरि पनि पुराना दलहरूलाई भोट दिएर परिवर्तन चाहने जनआन्दोलनको उपहास नगर्न मतदाताहरूलाई अनुरोध गरे।
घरदैलो कार्यक्रमका क्रममा उम्मेदवार पन्तले स्थानीय नागरिकहरूसँग प्रत्यक्ष भेटघाट गर्दै राष्ट्रिय स्वतन्त्र पार्टीको नीति, उद्देश्य तथा सुशासन, पारदर्शिता र जवाफदेहितामूलक राजनीतिक प्रतिबद्धताबारे जानकारी गराएका थिए।
कार्यक्रममा राष्ट्रिय स्वतन्त्र पार्टीका नेता–कार्यकर्ता, स्थानीय युवा तथा सर्वसाधारणको उल्लेखनीय सहभागिता रहेको थियो।
राष्ट्रिय स्वतन्त्र पार्टीले आगामी दिनहरूमा पनि जनस्तरसँग प्रत्यक्ष संवाद र सहभागितामूलक कार्यक्रमलाई निरन्तरता दिने जनाएको छ।
