वीरगंज । पर्सागढी नगरपालिका–६ को वडा कार्यालयबाट प्रवाह हुने सेवा तथा सिफारिसका काम विगत करिब तीन महिनादेखि बन्द भएपछि स्थानीयवासीले समस्या समाधानका लागि सक्रिय पहल थालेका छन् ।
बिहीबार वडा सम्बन्धी समस्या समाधानका लागि पूर्व वडा सदस्य तथा समाजसेवी अर्जुन प्रसाद गिरीको अध्यक्षतामा स्थानीय राजनीतिक दल, बुद्धिजीवी, समाजसेवी तथा नागरिक समाजका प्रतिनिधिहरूको बैठक बसेर विभिन्न निर्णय गरेका हुन् ।
बैठकले वडा कार्यालयबाट उपलब्ध हुने सेवा–सुविधा र सिफारिसलगायतका सम्पूर्ण कार्य बन्द हुँदा स्थानीय जनताले सास्ती खेप्नुपरेको तथा वडा तहबाट प्रदान गरिने आधारभूत सेवा प्रभावित भएको निष्कर्ष निकालेको छ ।
बैठकमा भएको छलफलअनुसार वडा कार्यालयको सेवा अवरुद्ध हुनुको मुख्य कारण वडा अध्यक्ष नवलकिशोर प्रसाद कलवार र पर्सागढी नगरपालिकाका नगर प्रमुख गोकर्ण पाठकबीचको आन्तरिक विवाद रहेको उल्लेख गरिएको छ । उक्त विवादका कारण वडा कार्यालयबाट प्रवाह हुने सेवा बन्द हुँदा सर्वसाधारण प्रत्यक्ष रूपमा मर्कामा परेको बैठकको निष्कर्ष छ ।
समस्या समाधानका लागि बैठकले आगामी साउन ११ गते सोमबार पर्सागढी नगरपालिकामा डेलिगेसन जाने निर्णय गरेको छ । त्यस दिन बिहान ११ बजे वडा नं. ६ का समाजसेवी, बुद्धिजीवी तथा नागरिकहरू नगरपालिकाको कार्यालयमा भेला भएर नगर प्रमुखसँग छलफल गर्ने तथा वडा कार्यालयको सेवा तत्काल सुचारु गराउन माग गर्ने निर्णय गरिएको छ ।
त्यसैगरी, वडा कार्यालयको सेवा सञ्चालन गराउन आवश्यक पहल, प्रयास र दबाबमूलक कार्यक्रम सञ्चालन गर्ने निर्णय पनि बैठकले गरेको छ ।
बैठकले अर्को निर्णय गर्दै वडा सम्बन्धी समस्या समाधानका लागि स्थानीय तह, जिल्ला प्रशासन कार्यालय पर्सा तथा सम्बन्धित मन्त्रालयमा निवेदन दिने, आवश्यक समन्वय र सहकार्य गर्ने तथा यथाशीघ्र सेवा प्रवाह सुचारु गराउन पहल गर्ने सर्वसम्मत निर्णय गरेको जनाएको छ ।
