वीरगंज । निर्वाचन आयोगले आगामी फागुन मसान्तभित्र स्थानीय तहको निर्वाचन गर्ने तयारी थालेसँगै वीरगंज महानगरपालिकासहित पर्साका स्थानीय तहमा सम्भावित उम्मेदवारबारे चर्चा सुरु भएको छ ।
यसपटकको स्थानीय निर्वाचनमा अघिल्लो निर्वाचनको तुलनामा उम्मेदवारका आकांक्षीको संख्या बढ्ने देखिएको छ । विशेषगरी वीरगंज महानगरपालिकाको मेयर पदमा वर्तमान मेयरदेखि पूर्व मेयर तथा नयाँ अनुहारसम्म एक दर्जनभन्दा बढी आकांक्षीको चर्चा हुन थालेको छ ।
वीरगंजका वर्तमान मेयर राजेशमान सिंह पनि पुनः मेयर पदमा प्रतिस्पर्धा गर्ने तयारीमा रहेको चर्चा छ । हालै विशेष अदालतबाट भ्रष्टाचार मुद्दामा सफाइ पाएपछि उनी पुन: मेयर मै चुनाव लडने निश्चित जस्तै भएकाे छ ।
सिंह कुन दलबाट चुनाव लड्ने भन्ने विषय भने स्पष्ट भइसकेको छैन । उनी यस अघिकाे निर्वाचन जनता समाजवादी पार्टी (जसपा) नेपालबाट मेयरमा निर्वाचित भएपनि यसपालिकाकाे निर्वाचनमा नेकपा एमालेबाट टिकट पाए एमालेबाटै प्रतिस्पर्धा गर्ने तथा अन्य अवस्थामा वैकल्पिक राजनीतिक दलबाट उम्मेदवारका रूपमा चुनावी मैदानमा आउन सक्ने चर्चा छ ।
त्यस्तै, वीरगंज महानगरपालिकाका पूर्व मेयर तथा नेकपा एमालेका केन्द्रीय सदस्य विजयकुमार सरावगी पनि पुनः मेयर पदमा प्रतिस्पर्धाको तयारीमा रहेको चर्चा छ । २०७९ को स्थानीय निर्वाचनमा सरावगी एमालेबाट मेयरका उम्मेदवार बनेका थिए । यसपालिकाे निर्वाचनमा सरावगी एमाले वा रास्वपाबाट उम्मेदवार हुने चर्चा छ ।
एमालेका पूर्व केन्द्रीय सदस्य अरविन्द सिंह पनि मेयर पदका आकांक्षीका रूपमा चर्चामा छन् । पछिल्लो समय एमाले नेतृत्वप्रति असन्तुष्टि जनाउँदै आएका सिंह राष्ट्रिय स्वतन्त्र पार्टी (रास्वपा) बाट उम्मेदवारीको प्रयासमा रहेको उनीनिकट स्रोतको दाबी छ । रास्वपाबाट टिकट नपाएको अवस्थामा अन्य दल वा स्वतन्त्र रूपमा समेत चुनाव लड्ने सम्भावना रहेको बताइन्छ ।
यसैगरी रास्वपा नेता सुधिर पटेल पनि वीरगंजको मेयर पदका आकांक्षीका रूपमा देखिएका छन् । यसअघि स्वतन्त्र रूपमा प्रदेशसभा सदस्यमा चुनाव लडेका पटेलले यसपटक रास्वपाबाट मेयरको टिकट दाबी गर्ने तयारी गरेको बताइएको छ । टिकट नपाएको अवस्थामा स्वतन्त्र उम्मेदवारी दिने सम्भावनासमेत रहेको उनीनिकट स्रोतको भनाइ छ ।
रास्वपाभित्रै मेयर पदका लागि अन्य आधा दर्जनभन्दा बढी आकांक्षी रहेको चर्चा छ । यद्यपि उनीहरू मध्ये रास्वपाबाट टिकट पाउने सम्भावना धेरै कम रहेकाे छ ।
अन्य दलतर्फ नेपाली कांग्रेस, नेपाली कम्युनिस्ट पार्टी, जनता समाजवादी पार्टी तथा अग्रगामी मोर्चालगायतबाट समेत सम्भावित उम्मेदवारबारे आन्तरिक छलफल हुन थाले पनि हालसम्म वीरगंजको मेयर पदमा उनीहरूका आकांक्षीको चर्चा तुलनात्मक रूपमा कम देखिएको छ ।
यसैगरी पर्साका अन्य स्थानीय तहमा पनि अध्यक्ष, प्रमुख तथा वडाध्यक्षका सम्भावित उम्मेदवारबारे चर्चा सुरु भएको छ । पछिल्लो प्रतिनिधिसभा निर्वाचनमा पर्साका चारवटै निर्वाचन क्षेत्रमा रास्वपाका उम्मेदवार निर्वाचित भएपछि स्थानीय तह निर्वाचनमा पनि उक्त दलबाट उम्मेदवारीका आकांक्षी बढेका छन् ।
तर प्रतिनिधिसभा निर्वाचनको परिणामलाई स्थानीय तह निर्वाचनसँग सोझै तुलना गर्न नसकिने भएकाले आगामी स्थानीय निर्वाचनमा दलगत संगठन, स्थानीय नेतृत्व, उम्मेदवारको व्यक्तिगत प्रभाव र स्थानीय राजनीतिक समीकरणले परिणाममा प्रभाव पार्ने देखिन्छ ।
