वीरगंज । रसुवाको भोटेकोशी नदीमा आएको बाढीमा परी बेपत्ता भएका वीरगंज महानगरपालिका–२७ उदयपुरघुर्मीस्थित कुहडी गाउँका दुई परिवारलाई नगर प्रमुख राजेशमान सिंहले शनिबार भेटेर अवस्थाबारे जानकारी लिनुभएको छ ।
भदौ १० गते बिहान भोटेकोशी नदीमा आएको अचानकको बाढीमा परी कुहडी गाउँका २९ वर्षीय सागर कर्ण र २८ वर्षीय मुन्ना अंसारी अझै बेपत्ता छन् । दुवै जना ट्रक चालक हुन् । रसुवा भन्सारबाट सामान लिएर फर्किने तयारीमा रहेका बेला उनीहरू बाढीमा बेपत्ता भएको परिवारले जनाएको छ ।
नगर प्रमुख सिंहले बेपत्ता परिवारका सदस्यहरूसँग भेट गरी घटनाको अवस्था तथा परिवारले भोगिरहेको पीडाबारे जानकारी लिनुभएको हो । उहाँले विपद्का कारण पीडामा परेका परिवारसँग महानगरपालिका साथमा रहेको बताउँदै आवश्यक सहयोगका लागि पहल गर्ने प्रतिबद्धता जनाउनुभयो ।
यसअघि नगर प्रमुख सिंहले वीरगंज–२२ जगरनाथपुरको एउटै टोलबाट भोटेकोशी बाढीमा बेपत्ता भएका ६ जनाका परिवारसँग समेत भेट गरी अवस्थाबारे जानकारी लिनुभएको थियो । यस्तै, वडा नम्बर ८ का बेपत्ता परिवारसँग पनि उहाँले भेट गर्नुभएको थियो ।
भोटेकोशी बाढीमा वीरगंजका विभिन्न वडाका नागरिक बेपत्ता भएपछि महानगरपालिकाले प्रभावित परिवारसँग प्रत्यक्ष सम्पर्क र समन्वय गर्दै आवश्यक सहयोगका लागि पहल गरिरहेको जनाएको छ ।
