काठमाडौं । आम जनता पार्टी (आजपा) निकट आम मुस्लिम मोर्चाले भोटेकोशी बाढीपीडितलाई ग्यास चुल्हो, सिलिन्डर तथा राहत सामग्री वितरण गरेको छ ।
मोर्चाले नुवाकोटको विदुरमा रहेका भोटेकोशी बाढीपीडित सयौं परिवारलाई खाना पकाउन आवश्यक ग्यास चुल्हो, सिलिन्डरलगायत राहत सामग्री वितरण गरेको हो ।
मोर्चाका केन्द्रीय अध्यक्ष लालबाबु मन्सुरीका अनुसार रौतहटको गुजरा नगरपालिका–५ का वडाध्यक्ष तथा मोर्चाका नेता शेख जमालुदिनको अगुवाइमा राहत वितरण गरिएको हो । राहत वितरणमा मुस्लिम अगुवा तथा समाजसेवी फारूक सेठ र शेख इर्शादले सहयोग गरेका थिए ।
मन्सुरीले बाढीपीडितको मागअनुसार राहत सामग्री उपलब्ध गराइएको बताए । उनका अनुसार आजपा अध्यक्ष एवं पूर्वमन्त्री प्रभु साहले रौतहट–३ मा ग्यास चुल्हो तथा सिलिन्डर वितरण सुरु गरेपछि त्यसबाट प्रभावित हुँदै मोर्चाले पनि पीडितलाई लक्षित गरी राहत अभियान अघि बढाएको हो ।
