वीरगंज । पर्साको पकाहाँ मैनपुर गाउँपालिका–२ मधुबनीमा पटाका पड्काउने क्रममा आगोले पोलेर गम्भीर घाइते भएका ८ वर्षीय बालकको मृत्यु भएको छ ।
मृत्यु हुनेमा मधुबनी निवासी रामगुलाम सहनीका ८ वर्षीय छोरा कुन्दन सहनी रहेका छन् । स्थानीयका अनुसार सोमबार बिहान करिब ८ बजे घरअगाडि पटाका पड्काउने क्रममा कुन्दनको छातीमा आगोले पोलेपछि उनी गम्भीर घाइते भई बेहोस भएका थिए ।
तत्कालै उनलाई उपचारका लागि वीरगंजस्थित तराई अस्पताल लगिएको थियो । तर, उपचारकै क्रममा उनको मृत्यु भएको मृतकका बुबा रामगुलाम सहनीले बताए ।
जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक चक्रबहादुर मल्लले सोमबार बिहान आफ्नै घरअगाडि पटाका पड्काउने क्रममा बालकको छातीमा पटाकाको छर्रा लागेर गम्भीर घाइते भएको र तराई अस्पतालमा उपचारका क्रममा मृत्यु भएको जानकारी प्राप्त भएको बताए ।
घटनाबारे प्रहरीले थप अनुसन्धान गरिरहेको प्रवक्ता मल्लले जानकारी दिए । यसैगरी पडका पडकाउने क्रममा पर्सामा आधा दर्जन भन्दा बढी बालबालिका घाईते समेत भएका छन् ।
