वीरगञ्ज । पर्साको वीरगञ्ज महानगरपालिका–२७ स्थित कुहडीमा दुनाटपरी उद्यमशीलतासम्बन्धी १५ दिने तालिम सुरु भएको छ। स्थानीयलाई सीप सिकाएर आत्मनिर्भर बनाउने उद्देश्यले तालिम सञ्चालन गरिएको हो।
प्रगतिशील दलित कृषक समूह वीरगञ्ज–२७ को आयोजना तथा डिजिम नेपालको सहयोगमा सञ्चालित तालिमको उद्घाटन वडाध्यक्ष हृदयनारायण प्रसाद कुर्मीले गरेका हुन्।
समूहका अध्यक्ष प्रभु पासवानको अध्यक्षतामा आयोजित उद्घाटन कार्यक्रममा साना किसान ऋण सहकारी संस्था उदयपुर घुर्मीका अध्यक्ष वीरेन्द्र कर्ण, नेकपा एमालेका नेता मनोज कुशवाहा, स्थानीय समाजसेवी रामनरेश यादव, शम्भु पासवान, समूहका सचिव राजकेश्वर पासवान, सदस्यहरू रमेशर हजरा र जयराम पासवान तथा वडा सदस्य प्रमोद कुशवाहालगायतको उपस्थिति थियो।
कार्यक्रममा तालिमका प्रशिक्षक इन्दु कुमारी कर्ण र संस्थाका सहयोगी बृजलाल पासवानले पनि मन्तव्य व्यक्त गरेका थिए।
प्रशिक्षक इन्दु कर्णका अनुसार तालिम लगातार १५ दिनसम्म सञ्चालन हुनेछ। तालिममा २७ जना सहभागी रहनेछन्।
तालिममार्फत सहभागीहरूलाई दुनाटपरी बनाउने व्यावहारिक सीप प्रदान गरिनेछ। यसबाट स्थानीयस्तरमै साना उद्यम सञ्चालन गरी आयआर्जन बढाउन तथा आर्थिक रूपमा आत्मनिर्भर बन्न सहयोग पुग्ने अपेक्षा गरिएको आयोजकले जनाएको छ।
