वीरगंज । जेन जि पर्साले वीरगंज महानगरपालिकाको आर्थिक अवस्थासम्बन्धी विस्तृत सूचना माग गरेको छ । जेन जि पर्साका संयोजक बिशेष साहको नेतृत्वमा गएको टोलीले बुधबार महानगरपालिकासँग आर्थिक विवरण उपलब्ध गराउन माग गरेको हो ।
टोलीले महानगरपालिकाको हालसम्मको आर्थिक अवस्था, आय–व्यय विवरण, सञ्चित कोष तथा बैंक मौज्दात, आन्तरिक राजस्व, संघीय तथा प्रदेश सरकारबाट प्राप्त अनुदानलगायतका विषयमा प्रमाणित विवरण माग गरेको छ ।
त्यसैगरी, महानगरपालिकाको विकास तथा पुँजीगत खर्च, भुक्तानी दिन बाँकी दायित्व र लेखापरीक्षण प्रतिवेदनसम्बन्धी विवरणसमेत उपलब्ध गराउन टोलीले माग गरेको जनाएको छ ।
सार्वजनिक बजेट तथा नागरिकबाट संकलित करको रकम पारदर्शी र प्रभावकारी रूपमा उपयोग हुनुपर्नेमा जोड दिँदै जेन जि पर्साले महानगरपालिकाको वास्तविक आर्थिक अवस्था नागरिकसमक्ष स्पष्ट हुनुपर्ने बताएको छ ।
सार्वजनिक खर्चको पारदर्शिता, सुशासन र नागरिकप्रतिको जवाफदेहिता सुनिश्चित गर्न आर्थिक विवरण सार्वजनिक हुनु आवश्यक रहेको टोलीको भनाइ छ ।
जेन जि पर्साले सुशासन, आर्थिक पारदर्शिता र सार्वजनिक जवाफदेहिताका लागि आफ्नो निगरानी तथा खबरदारीलाई निरन्तरता दिने जनाएको छ ।
