वीरगन्ज । १०औँ राष्ट्रिय खेलकुद प्रतियोगिताका लागि आयोजित मधेस प्रदेशस्तरीय छनोट प्रतियोगितामा तेक्वान्दोतर्फ पर्सा जिल्लाका ६ जना खेलाडीले प्रथम स्थान हासिल गरेका छन्।
मधेस प्रदेश तेक्वान्दो संघको सहकार्यमा बाराको निजगढमा मङ्सिर ४ र ५ गते सञ्चालन भएको छनोट प्रतियोगितामा पर्साका खेलाडीहरूले उत्कृष्ट प्रदर्शन गर्दै विभिन्न तौल समूहमा प्रथम स्थान हासिल गरेका हुन्।
प्रथम स्थान हासिल गर्ने खेलाडीहरूमा ५४ केजी तौल समूहमा आसिफ हुसेन अन्सारी, ६८ केजीमा मोहम्मद शोएब अख्तर, ७४ केजीमा विक्रान्त डंगोल, ८० केजीमुनि इमरान शेख र ८७ केजीमा रोहन पटेल रहेका छन्।
त्यसैगरी महिलातर्फ ६३ केजी तौल समूहमा नाजिया हसन सिद्दिकीले प्रथम स्थान हासिल गरेकी छन्।
प्रतियोगितामा पर्साकै दीपेश मानन्धरले ८७ केजीभन्दा माथिको तौल समूहमा दोस्रो स्थान प्राप्त गरेका छन् भने कुकी मुखियाले ५७ केजी तौल समूहमा तेस्रो स्थान हासिल गरेकी छन्।
छनोट प्रतियोगितामा उत्कृष्ट प्रदर्शन गर्दै प्रथम स्थान हासिल गरेका पर्साका ६ खेलाडीले आगामी १०औँ राष्ट्रिय खेलकुद प्रतियोगितामा मधेस प्रदेशको प्रतिनिधित्व गर्ने अवसर पाएका छन्।
प्रदेशस्तरीय छनोटमा पर्साका खेलाडीहरूको सफलताले जिल्लाको तेक्वान्दो खेलको विकास र सम्भावनालाई थप उजागर गरेको छ।








