वीरगंज । बाराको महागढीमाई नगरपालिका–१ स्थित पासाहा पुलनजिक रहेको शुभश्री जगदम्बा वासिङ एण्ड क्रसिङ कम्पनीका सञ्चालक अनिल कुमार पटेलमाथि आक्रमण भएको छ । शनिबार बिहान करिब ९ः२४ बजे ३० देखि ३५ जनाको समूहले क्रसर उद्योगमै पुगेर आफूमाथि ज्यान मार्ने उद्देश्यले आक्रमण गरेको पटेलले आरोप लगाएका छन् ।
पटेलले मधेश प्रदेशका पूर्वअर्थमन्त्री सुनिल कुमार यादवसहितको समूहले आफूमाथि आक्रमण गरेको आरोप लगाएका हुन् । उनका अनुसार महागढीमाई नगरपालिका–२ इनर्वाका रामप्रसादसँग चेक अनादरसम्बन्धी मुद्दा बारा जिल्ला अदालतमा विचाराधीन छ । उक्त मुद्दा फिर्ता लिन दबाब दिँदै रामप्रसादले पटक–पटक ज्यान मार्ने धम्कीसहित दबाब दिँदै आएका हुन् ।
शनिबार बिहान क्रसर उद्योगमा काम गरिरहेको अवस्थामा रामप्रसादसहितको समूहले आफूलाई चारैतिरबाट घेराबन्दी गरी कुटपिट गरेको पटेलले बताएका छन् । सो क्रममा सुनिल कुमार यादव भन्ने जितेन्द्र कुमार यादवले हकी प्रहार गरेको र बच्चुलाल यादवले हेलमेटले टाउकोमा प्रहार गरेको उनको दाबी छ ।
स्थानीय प्रत्यक्षदर्शीका अनुसार पटेलमाथि आक्रमण भइरहेको देखेपछि बचाउन पुगेका क्रसरका कर्मचारी मनोज साहमाथि पनि कुटपिट भएको थियो । बच्चुलाल यादवले लाठी तथा लात्तीले छातीमा प्रहार गर्दा साह गम्भीर घाइते भएको पटेलले बताएका छन् ।
घटनामा घाइते भएका पटेल र साहलाई सुरुमा कलैया अस्पताल पुर्याइएको थियो । त्यहाँबाट थप उपचारका लागि परवानीपुरस्थित एलएस न्युरो एण्ड जनरल हस्पिटलमा लगिएको हो ।
घटनापछि प्रहरी चौकी बरियारपुरको टोली घटनास्थल पुगेको र त्यसपछि आक्रमणमा संलग्नहरू फरार भएको पटेलको भनाइ छ । उनले घटनाको भिडियो रेकर्ड, अस्पतालको जाँच पुर्जी तथा अन्य प्रमाणसमेत प्रहरीसमक्ष पेस गरेको बताएका छन् । घटना बारे अनुसन्धान भइरहेकाे प्रहरीले जनाएकाे छ ।
यता, आरोपित पूर्वमन्त्री सुनिल कुमार यादवले भने आफूले कसैमाथि आक्रमण नगरेको दाबी गरेका छन् । दुई पक्षबीच झगडा भइरहेको जानकारी पाएपछि छुटाउनका लागि आफू घटनास्थल पुगेको उनले बताए । दुई जनाबीचको लेनदेनसम्बन्धी विवादका कारण झगडा भएको उनको भनाइ छ ।








